Director di Serlimar ta lamenta accion innecesario

ORANJESTAD – E accion di awe mainta na Serlimar a afecta e operacion diario, segun e director Sr Davelaar a bisa durante un conferencia di prensa dialuna atardi. Asina e ta reacciona riba e accion di awe mainta di e trahadonan cu pa motibo di disgusto, a pone trabou abou y cera e portanan na candal, pa trucknan no por a sali. 

NOTIFICACION

Segun Davelaar, ta 1’or di marduga el a ricibi un carta di sindicato, unda cu ta notifik’e di e inquitud y cu lo tin un accion mainta. E mes a bay trabou pa 7’or unda cu enberdad tabatin un accion andando. E ta lamenta e accion mirando cu tur e puntonan menciona, ta wordo procesa algun tempo caba pues no tabata necesario pa e accion. Mes momento a mustra cu e accion ta stroba e operacion pa cual por spera un caso sumario. Segun Davelaar, esey a pone e sindicatonan cambia y kita candal pa operacion por a continua. A mustra cu e operacion obviamente a keda afecta, pa cual lo saca un notificacion pa notifica clientenan cu tur cos lo cambia e siman aki y hala cu un dia.