Segun minister, e mes a ofrece pa pasa Trai Merdia pa otro minister

ORANJESTAD – Segun minister di Enseñansa Rudy Lampe, ta e mes ta esun cu a sugeri diabierna den conseho di minister, pa laga Trai Merdia cay bou di minister di minister di asuntonan Social, Glenbert Croes. Esaki el a bisa dialuna mainta durante e conferencia bisemanal di gobierno. Cu esaki e kier kita e impression cu gobierno a ‘kita’ e parti aki di dje y duna otro minister pasobra e ‘lo no a maneha esaki bon’. 

MASHA TEMPO

Segun Lampe, ta masha tempo e cambio aki ta den planeacion. Su pensamento ta cu ta trata di tanto voorschoolse opvang como naschoolse opvang y e ultimo aki ta netamente Trai Merdia. E partinan aki ta mas social, y no ta trata di enseñansa ‘pasobra no ta haya les y ni tin curiculo eynan’, pues no ta enseñansa’ e mandatario a sigui indica. 

INVESTIGACION

Awor cu Trai Merdia no ta cay bou di dje mas, e por sigui cu e investigacion cu ta tumando lugar eyden pa fondonan cu a wordo malusa, unda cu mester compronde cu lo a paga hende sumanan cu nan no mester a haya. Mes momento a sigura cu no ta bay perhudica esnan afecta pasobra nan no por a yuda cu e fayo aki, sino mas bien ta trata di un problema administrativo di gobierno cu no a wordo coregi. 

SITUACION TENSO

Manera ta conoci, diabierna ultimo minister  presidente a anuncia despues di un reunion di conseho di minister, cu a dicidi di para tur plan di cambio pa Trai Merdia y SPO, y asina trece trankilidad den e parti ey di enseñansa. Mesora a sali e percepcion cu ta mal maneho di e minister cu a trece tension y cu tabata necesario pa establece trankilidad bek den enseñansa. Cu e declaracion di awe mainta, e mandatario kier a sigura cu no ta kita nan a kita cos di dje, sino cu e mes a ofrece pa pase pa su colega minister.