Descuido desafortuna di parlamentario na Hulanda ta causa sensacion

DEN HAAG – Un descuido desafortuna di un parlamentario di Aruba na Hulanda durante e reunionan di IPKO a crea un sensacion tanto na Hulanda y local, ora cu un periodista di e portal Caribisch Netwerk (CN) a tuma nota di esaki y a duna publicacion na e momento aki. E parlamentario en cuestion a opta pa riba su ipad wak e plataforma di Netflix, durante un presentacion di un miembro di delegacion, envez di pone atencion na e reunion e momento ey. E portal aki a compronde cu e lider di e partido di cual e parlamentario (Sueann Ras) ta forma parti, lo duna su prome reaccion riba e tema den un comunicado despues. 

COMENTARIO

For di momento cu e articulo a keda publica riba CN, esaki a haya un bida riba su mes riba rednan social mas tanto. Critica riba e acto di e Parlamentario, comprendiblemente tabata hopi. E critica mas grandi tabata cu Parlamentarionan mester sa miho di ta haci cosnan asina. E acto mes no tabata algo ilegal, pero si inoportuno. Y manera ta sosode, cu ayudo di rednan social, a haya un bida riba su mes. Sostenedornan di otro banda a mustra cu mientras cu e acto no tabata esun di miho, y cu e parlamentario mester sa miho, nada ilegal no a wordo cometi, pa e haya e atencion asina grandi. No ta inusual cu parlamentarionan ta actua den forma diferente durante reunionan, y ta opta pa tin atencion riba otro cos. Den e caso aki, e parlamentario aki a wordo mira pa e periodista. Mientrastanto, e portal aki a compronde cu e parlamentario a pidi su despensa na e delegacionnan di IPKO, y ta spera di por continua cu e reunionan e siman aki, cu ta di sumo importancia. Segun su mesun reaccion, el a descuida di tene e mision cu el a bay Hulanda cu ne dilanti bista. Esey ta desafortuna anto pa esey el ta pidi su disculpa.