Maduro: CAFt no tin pia pa para ariba (pa conseha aanwijzing)

ORANJESTAD – “CAFt ta malusa (su) poder contra Aruba”.  Ademas, - asina minister di finanza Xiomara Maduro a sigura prensa den un tono di disgusto -, CAFt no tin e base legal pa conseha RMR pa duna Aruba un instruccion. Durante e conferencia di prensa diabierna mainta, Maduro a referi tambe na e carta di 6 pagina cu el a manda contesta CAFt un dia prome. Su tono den e carta sinembargo tabata uno mas diplomatico, compara cu e tono usa den e conferencia.   

DISGUSTO

E mandatario no a sconde su disgusto pa e forma con e colegio di supervision ta anda cu Aruba, y a tuma su tempo pa ilustra esaki extensamente. E base di su argumento ta, cu CAFt no tin e autoridad pa menasa cu un instruccion manera cu nan kier impone den nan ultimo carta. Y mientras cu e mandatario ta cuestiona e forma di CAFt di trece tur cos den publicidad mesora, (prome cu e mes haya esaki), e mes (Maduro) a parti e carta ultimo cu el a manda diahuebs pa CAFT, rond pa prensa diabierna mainta. 

STEMMENMAKERIJ

Loke e mandatario kier a sigura tur hende, ta cu e si no ta ta participa den ‘stemmenmakerij’, cu ta netamente loke e ta considera e caso cu e actuacion di CAFt su carta. E ta referi na e hecho cu CAFt ta manda un carta pa gobierno dia 12 di juni, informando Gobierno cu nan (CAFt) no ta bin Aruba mas pa motibo cu no ta considera esaki oportuno, despues cu Parlamento a ‘schakel RMR’ uit den e ley nobo di LAFt cu ta pone CAFt raporta  solamente na Aruba. Segun Maduro, apenas un siman despues esta 20 di juni, e mesun CAFt ta manda otro carta pa gobierno, pero e biaha aki menasando cu un conseho pa RMR di un instruccion (aanwijzing) si Aruba no cumpli cu su recomendacionan, y tin cu haci esaki den (apenas) 7 dia. Segun Maduro, ta conoci cu e ley (di LAFt) ta reglamenta cu pa cada reaccion, partidonan ta haya 14 dia pa contesta. Pero den e caso aki segun e mandatario, CAFt a pura cu e ultimatum pa cuadra cu e reunion di RMR di dia 5 di juli proximo. Cu esaki e (CAFT) kier score y haci ‘stemmenmakerij’, na fabor di Hulanda. “E ta mustrabo cu nan ta traha (un) ambiente y bay RMR (dia) 5 di juli (2019). CAFt ta malusa (su) poder contra Aruba” e mandatario a sigui bisa. Segun e mandatario, e si no ta participa den esaki. Como tal e no a reacciona mes riba e carta di dia 10 di juni ultimo, pasobra e contenido ta papia pa su mes. Pero e carta ultimo si, el a contesta extensamente cu 6 pagina. 

CAFT TA CONTRADECI SU MES

E mandatario ta considera cu CAFt ta contradeci su mes tambe den nan carta. Den pasado recien, CAFt mes a indica cu nan ta satisfecho cu e presupuesto pasobra Aruba a cumpli cu e normanan. “CAFt ta bisa cu e (presupuesto) ta realistico pero mes ta opta pa escala” Maduro a sigui bisa. Cu esaki (escala:red) e ta referi na e proceso cu ta cuminsa awor di contestacion entre partidonan cu por termina te na RMR. E mandatario a sigura cu e ley di LAFT anterior a vence na final di 2018, y cu awor ta bay segun protocol firma cu Hulanda y no e ley pues e ley actual di LAFT, no tin validez mas. 

INFORMA Y PIA PA PARA ARIBA

E mandatario ta cuestiona e hecho cu CAFt ta bisa den nan carta cu e mandatario no kier duna informacion. Aki e la bira indigna bisando cu e no ta tolera wega. “CAFt no tin pia pa para ariba” Maduro a bisa. “Kizas e info no ta loke abo kier tende. (CAFt) kier forza algo cu no a wordo palabra den e protocol”, e mandatario a sigui bisa. 

REACCION DI HULANDA

E mandatario riba pregunta di NoticiaCla, a confirma cu e video call a tuma lugar entre Aruba y Hulanda recientemente, pero cu esey no ta e reaccion official cu Aruba ta sperando di Hulanda riba e cambio di ley di LAFT. Esun ‘oficial’, ta e reunion di Conseho di Minister di Reino, programa pa otro siman diabierna, dia 5 di juli proximo. Riba e fecha ey, RMR tin cu dicidi kico ta haci cu Aruba, pa loke ta e ley nobo di LAFt. Y si ta necesario pa duna Aruba un instruccion, of laga pasa y duna Aruba un chens mas. Lesa e carta di minister Maduro pa CAFt AKI.