Alarma pa avion a crea mas stagnacion den trafico merdia

ORANJESTAD – E critica di mas grandi diabierna merdia, tabata e trafico pega na Oranjestad, mas concreto, e area di Dakota, aeropuerto y Cumana. Mientras cu a avisa caba cu DOW lo a cera e rotonde di FCCA, e trafico a pega porta mas cu a spera. Y despues di un rato, e motibo tabata conoci. Alarma grandi bati pa capitan di un avion di Copa Airlines diabierna merdia, a causa e panico extra necesario. E alarma a wordo bati, segun vocero di aeropuerto Hendrik Croes, pa problema cu flaps di e avion. Mientrastanto e avion a baha sano y salvo. E problema di trafico porta tabata e crisis mas pio e ora ey. Esaki pasobra fuera di e cerada di crusadanan y caminda pa aeropeurto como medida di seguridad, DOW (manera anuncia anteriormente) a cera e rotonde di FCCA tambe, cu a empeora e situacion di trafico mas ainda. 

DISCULPA

For di oficina di minister di infrastructura, a confirma e motibo di e chaos total di trafico merdia. “E situacion fastioso di trafico cu a tuma luga merdia, tabata debi na un situacion di emergencia di aeropuerto cu a sosode debi na un “melding” di Copa Airlines cual a conduci cu autoridadnan a cera varios ruta como medida preventivo. Adicionalmente tabatin planificacion di caminda cera awe, cual DOW a anuncia adelanta cu rutanan alternativo pa trabounan cu lo tuma luga entre rotonde FCCA te cu rotonde di Codemsa pa pone ultimo capa di asphalt” e mensahe a bisa. “ E combinacion aki a complica situacion unrato sinembargo ya e situacion ta normal bek manera DOW a anuncia desde fin di siman cu e trabounan lo ta tumando luga y desviacionnan” e mensahe a bisa. 

HOPI RABIA

Ciudadanonnan automobilistanan no a sconde nan disgusto pa e situacion di trafico merdia, unda cu rapidamente tabata comparti potret, video y reclamo textual riba e.o. Facebook. Mientras cu ta bisa cu e situacion tabata ‘djies’ pa merdia, automobilistanan tin miedo cu e situacion aki lo perdura henter weekend. Di otro banda, otronan ta bisa cu mester tene pasenshi, pasobra ta ‘solamente pa dos dia’.