Desaroyadornan di Baby Beach Hotel San Nicolas a bishita gobierno

ORANJESTAD - Diaranson atardi desaroyadornan di e proyecto hotelero pa San Nicolas, esta Baby Beach Hotel (Three Rivers Real Estate) a bishita gobierno di Aruba.   Aki a intercambia di pensamento cu Prome Minister sra. Evelyn Wever - Croes hunto cu colega Minister di Turismo sr. Dangui Oduber, Minister di Labor sr. Glenbert Croes y Minister di Husticia sr. Andin Bikker. E reunion na Bestuurskantoor a tuma luga despues cu diarason mainta a termina cu e proceso di traspaso di e tereno na e grupo Three Rivers, den cuadro di e proceso encamina via DIP, DOW y demas instancianan. Recientemente Banco Central Aruba a otorga e permiso pa e desaroyadornan por importa e placa den cuadro di e ultimo fase cu tabata falta pa adkisicion di e tereno cu ta trata e “performance bond”. Ta trata di un suma promedio di 13 miyon, pa un proyecto di riba 200 miyon cu ta bay tuma luga.

Ademas, den e reunion cu Gobierno e desaroyadornan a presenta ultimo diseñonan di e proyecto, cual a wordo presenta anteriormente na DOW y a haya aprobacion pa esakinan. Mas atardi, despues di e reunion cu a tuma luga den sala di Conseho di Minister, Three Rivers Real Estate a reuni tambe cu esnan di San Nicolas Business.