Sindicatonan: Gobierno no a bin cu nada nobo pa indexering

ORANJESTAD – Gobierno a cumpli cu peticion di e grupo di 5 sindicato riba e tema di indexering diaranson, den sentido cu a duna nan un proposicion riba e tema. Problema ta, segun Eduard Maduro cu ta vocero di e grupo di sindicato, cu ‘nos ta mesun caminda cu siman pasa’. Den un reaccion cortico pa NoticiaCla, Maduro a splica cu a haya un contesta conforme e ultimatum cu ta awe, pero “el a contesta algo cu nos tabata sa caba”. Pa loke ta e siguiente paso, Maduro a bisa cu tin cu bay analisa e carta cu nan a haya di gobierno. No ta conoci ki dia nan lo bin cu un proximo paso. 

E CASO

Manera ta conoci, sindicatonan SEPPA, TOPA, SADA, Simar y SPA a duna gobierno di Aruba te cu diaranson (awe)   pa bin cu un (contra) proposicion riba e tema di indexering. Di otro forma, nan ta haya nan mes obliga pa informa nan miembronan respectivo y planea e siguiente paso. Asina e 5 sindicatonan menciona, a informa gobierno pa medio di un carta manda diahuebs siman pasa. A dicidi cu e vocero pa tur sindicato, ta bira tambe e presidente di sindicato SADA, Eduard Maduro. Den e carta cu nan a manda pa gobierno, nan ta mustra cu e contesta di ‘no tin espacio’ pa paga indexering, no ta un punto, ya cu esaki ta semper wordo usa. De hecho, no por culpa sindicato pa e situacion y si tabata sa di tuma medida sin consulta cu e sindicatonan, mes momento awor ta gobierno ta esun pa bin cu un solucion pa resolve e asunto y percura pa paga indexering di 2018 y wak con ta bin cu un plan pa paga esaki den e añanan nos dilanti. Un reunion cu a tuma lugar e siman aki, no a resulta positivo, unda cu gobierno un biaha mas a informa e sindicatonan cu no tin espacio pa paga indexering. Nan ta bou di presion di e.o. CAFT pa reduce gastonan di personal y mucho mas cos cu ta pone cu dificilmente nan por paga indexering aworaki. Lesa e carta di sindicato AKI.