Gobierno di Bonaire a forza minister Plasterk adapta bishita

KRALENDIJK – Debi na intervencion serio di gobierno di Bonaire, minister hulandes Ronald Plasterk lo adapta su programa segun conveniencia di bestuurskantoor di e isla otro siman. Tabata e siman aki cu, - fuentenan di NoticiaCla.com a confirma- , miembronan di bestuurskantoor di Bonaire a manda un carta di protesta pa Hulanda, exigiendo mas respet di e mandatario pa cu su bishita proximo na e isla di flamingo. E programa inicial di e mandatario lo tabata uno mas bien ‘impone’ riba e gobernantenan, sin aviso previo.

Gobierno di Bonaire a manda bisa e mandatario cu si ta asina, nan lo no kier y lo no topa cune durante su bishita proximo. Riba esaki, gobierno di Hulanda lo a baha cabez y a dicidi di informa gobierno di Bonaire cu nan lo ‘adapta’ nan mes segun schedule di e gobierno local. Cu esaki, tur partido a keda contento y Plasterk lo por topa miembronan di Bestuurskantoor sin problema otro siman dialuna. E mandatario mes ta yega Bonaire diadomingo pa cuminsa su bishita na varios isla di Reino Hulandes, incluyendo Corsou. E biaha aki e no ta programa pa bishita Aruba. NoticiaCla.com a compronde cu e lo mester a bishita St Maarten tambe pero cu esaki aparentemente no ta sigui.

Na Bonaire, den seno di gobierno tabatin un ambiente positivo, mirando cu ta practicamente prome biaha cu gobierno boneriano (desde 10-10-10) a pone pia abou y a mustra gobierno hulandes cu nan no por haci y deshaci sin mas. E acto di e siman aki a mustra cu e gobierno ta para firme pa loke e ta kere aden. Con esaki lo afecta e relacion cu Hulanda, no ta conoci.