Segun aeroliña Mericano, demanda pa Aruba a crece debi na situacion di Republica Dominicana

NEW YORK – Demanda pa Aruba como destinacion di Delta Air Lines for di Merca a subi cu 31%, debi na e situacion di Republica Dominicana. Asina e aeroliña ta raporta. E aeroliña mientrastanto ta dunando su pasaheronan e oportunidad pa cancela nan pasashi pa Republica Dominicana, sin cu nan ta haya multa. E buelonan cu ta cubri pa e ‘waiver’ ta buelonan pa y di Punta Cana, cu ta unda varios mericano a fayece durante e ultimo aña. Otro destinacionan di e isla, ta wordo dicidi segun e casonan presenta. 

CANCELACION

E cantidad di cancelacion a aumenta barbaramente y ta papia di 51% di cancelacion entre 1 y 19 di juni ultimo. Reservacionan nobo pa e isla a cay cu 73% compara cu e mesun periodo di e aña anterior. 

DESTINACION NOBO

Fuera di Aruba, booking pa otro islanan tambe a aumenta. Pa Bahamas esaki a aumenta cu 45% y Jamaica cu 26%. 

DISPUTA

Di parti di gobierno di e isla, ta disputa e informacionan y ta mustra cu ‘no ta berdad cu tin un avalanche di turista Mericano muriendo den nos pais”e minister di turismo di e isla, Javier Garcia a bisa periodistanan riba e isla.   

REACCION ARUBA

Den un reaccion recien di e CEO di Aruba Tourism Authority Ronella Tjin Asjoe, riba e tema di isla sigur, el a toca contesta e tema aki tambe indicando cu no ta e intencion pa capitalisa riba situacion particular aki pasobra no tin e necesidad pa cu demanda. Mes momento tin cu tene cuidao con ta atende cu esaki pa no mustra incencitivo pa un pais bisiña ya cu esey no ta e forma con Aruba ta trata otro paisnan como destinacion. E ehecutivo di turismo tabata referi particularmente riba e parti di seguridad pa cu nos isla, y con pa propaganda esaki como un destinacion mas sigur. Den bista di esaki a combina e contesta riba e tema di Republica Dominicana.