Knops: Proposicion di Hulanda di concepto ley di disputa mes ta esun miho

DEN HAAG – Gobierno Hulandes no ta receptivo pa e critica di expertonan riba e proposicion di un Rijkswet Koninkrijksgeschillen y ta insisti cu e proposicion cu gobierno Hulandes a haci, ta esun corecto. Otro siman Tweede Kamer ta trata e ley aki, cual ley segun secretario di estado Hulandes Raymond Knops, ta cumpli cu e intencion di 2010, pa laga un instancia independiente dicidi riba disputa den Reino. Asina Knops ta bisa den un nota dpresenta e siman aki na Tweede Kamer.  

E CARTA

E carta di 16 pagina cu NoticiaCla tin den su poder, ta contesta preguntanan tambe di varios fraccion di Parlamentonan di Caribe Hulandes y di Tweede Kamer. Aruba tin problema cu e ta omiti e provision independiente di control conforme articulo 12a di Statuut. Pero segun Knops ta netamente esey ta ok cu e departamento consehero di Raad van State. Segun Knops, e punto di salida ta cu RMR lo no desvia di e decision tuma (pa e organo aki, esta RvS). Algo cu den e concepto ‘nobo’ ta wordo fortifica. “Mi ta considera cu e provision stipula como uno adecuado” Knops ta bisa, pues ta rechasa e ponencianan di obhecion presenta y ta para ariba cu gobierno Hulandes tin rason. Knops no kier tende di un decision definitivo, manera propone pa e Parlamentonan den Reino, pasobra ‘experiencia a mustra cu den practica den Reino, desaroyonan por presenta cu ta hustifica un perspectiva mas amplio cu di un simple evaluacion di legalidad  den un caso specifico’. 

CONCEPTO NOBO

Dos fraccion di Tweede Kamer (SP y Groenlinks) a sugeri pa bin un otro proposicion riba e tema. Algo cu gobierno Hulandes (lesa:Knops) no a aprecia pero ta compronde. Segun Knops, Tweede Kamer ta liber pa bin cu un proposicion nobo, cu ayudo di e ministernan plenipotenciario di e islanan di Caribe Hulandes. ‘Pero un proposicion asina mester por conta cu sosten di gobierno (Hulandes)’ e documento ta sigui bisa. “Pa e motibonan cu a wordo indica aki y den otro documento, Gobierno (Hulandes:red) no ta defenser di un procedura di solucion di controversia, unda cu un instancia externo por duna un sentencia definitive na RMR’. 

DIFICILSegun Knops, loke ta dificulta e punto di yega na un consensus riba e concepto, ta ‘pasobra e interes di Hulanda di un banda y Aruba, Corsou y St Maarten di otro banda, ta diferencia. E problema cu Hulanda tin segun Knops, ta cu decisionan cu por sali for di un disputa, por choca cu interes di Reino y otro interes cu den un caso concreto, por pisa mas fuerte. 

GOBERNADORDen un di e preguntanan, ta cuestiona si e concepto di disputa proponi ta trece problema pa cu ehecucion di trabou di Gobernador den sentido cu por frena su tarea den tumamento di decision. Knops ta refuta e parti aki tambe. “ Esaki pasobra e proposicion tin di haber decisionan di RMR. Decisionan di Gobernador, como organo di Reino, ta cay pafo di e alcanse di e proposicion”, Knops ta sigui bisa riba pagina 8 di e contesta. Sinembargo ta bisa tambe cu indirectamente Gobernador por for a parti di un proceso di disputa. Esey ta ora cu RMR duna Gobernador un instruccion (aanwijzing) basa riba articulo 15 di e reglement di Gobernador, pa dune cierto autoridad. “Den un solo caso, e asunto no por bira e topico di un disputa. Esey ta ora cu Gobernaodr segun articulo 21 di reglement, dicidi cu un landsverordening of un landbesluit no ta wordo firma, debi cu e ta enpugna cu derecho internacional of derecho di Reino”. Den un caso asina, Gobernador ta obliga pa presenta e ley na gobierno di Reino, cu despues di a scucha Raad van State, dicidi si e ley ta malo of no, segun Knops. “Mi no tin miedo cu e proposicion di e concepto por conduci cu Gobernador ta wordo stroba den eherce su funcion pa loke ta tumamendo di decision. E proposicion primeramente ta relaciona cu decisionan di RMR”.