Serlimar ta cobra recoho di sushi na januari 2015

ORANJESTAD – Despues di a pospone esaki algun biaha den pasado, diahuebs merdia, Serlimar a anuncia e introduccion di e ‘Tarifa Residencial’ cu lo cuminsa wordo cobra na januari 2015. Segun Serlimar, e origen y esencia di esaki ta funda completamente segun un base legal. Desde aña 2005, e Ley Instelling Servicio di Limpiesa di Aruba (AB 2005 no. 5) ta na vigor. Esaki ta regula pa Serlimar sui generis factura directamente tur punto di coleccion (vivienda) na Aruba e Tarifa pa Recogemento di Desperdicio Residencial (Tarifa Residencial). Siendo di un compania gubernamental sui generis, e tarifa aki ta uno stabil cu no ta basa riba ganashi. Te cu awor, gobierno di Aruba a absorbe esaki.

Durante e ultimo añanan, Serlimar a transforma y mehora e servicio di coleccion di desperdicio residencial enormemente y como tal e momento a yega, despues di 9 aña, pa introduci e Tarifa Residencial.

Un pakete completo di servicio

E gran ventaha di e tarifa aki ta cu e ta garantiza cu Serlimar lo por sigui ofrece tur cas un pakete completo:

•   servicio semanal di recoge e desperdicio residencial;

•   mantencion limpi di bo bario (incl. snoei mata/yerba y eliminacion di dumpnan ilegal);

•   servicio di recoge bestia morto (mascota y/of demas bestianan morto den bo bario);

•   uzo di e containerpark na Parkietenbos pa desperdicio residencial;

•   organisacion di Milieustraat den bario (ponemento di containers di 30 yarda pa grofvuil residencial).

Pues e ta ensera e servicio semanal na bo cas directamente y ademas e ta inclui diferente servicio pa e higiena y mantencion limpi di areanan publico di bo bario.

Na comienso di januari 2015 lo bo ricibi un factura anual cu ta cubri tur 12 luna di 2015. Por fabor, controla tur datos personal. Si esaki no ta corecto, ta pidi pa jena e formulario “Datos di Cliente” riba www.serlimar.org/datosdicliente of pasa na e oficina pa actualisa esaki mas pronto posibel pa asina bo cuenta di cliente ta na ordo. Alaves, si bo no a ricibi factura, comunica cu Serlimar pa asina bo ricibi esaki.

Opcionnan di pago

Bo persona tin e opcion di paga pa luna, pa cuartal , pa 6 luna (esta 2 cuartal), pa aña, of un combinacion di e opcionnan menciona. E opcion di pago pa cuartal, pa 6 luna y pa aña, no tin costo adicional administrativo. Pago pa luna ta trece costonan adicional administrativo di Afl. 1,50 pa cada luna. Pues pagando pa aña, pa cuartal, of pa 6 luna, bo ta spaar tempo y placa.

Pagonan por ser haci na nos oficinanan na Paradera of na San Nicolas (cash of cu debitcard). Tambe por haci un transaccion online of via banco pa nos cuentanan di banco manera stipula riba e factura. Mester specifica bo number di cliente y number di factura correspondiente den e transaccion. Serlimar lo facilita tur e detaillenan aki na tur su clientenan mediante un carta na cas.