Hotel pa San Nicolas a haya luz berde pa transferi fondo y firma acta

ORANJESTAD – Tur cos ta mustra cu e desaroyadornan di e proyecto hotelero pa San Nicolas, Three Rivers Real Estate a haya luz berde pa garantisa e proyecto definitivamente. Un carta cu NoticiaCla tin den su poder di Banco Central, ta confirma cu e compania a haya e licensia pa por transferi fondonan necesario pa Aruba pa por cuminsa cu e construccion di e proyecto. E carta ta fecha dia 14 di juni 2019, y ta otorga e asina yama ‘foreign exchange license’ na e compania. Mes momento e portal aki a compronde cu diaranson e compania ta pasa acta na notario, durante cual e ta haya e terenonan necesario pa por cuminsa traha riba dje. 

PERFORMANCE BOND

Mes momento tambe e compania a transferi e asina yama ‘performance bond’ di 15 miyon dollar pa Aruba, segun regla ta prescribi. E licensia cu e compania a haya otorga pa Banco Central, ta permiti transferencia di fondonan miyonario ( ta haci mencion di 30 miyon dollar) cu e intencion pa desaroya dos hotel na Seroe Colorado, di 900 camber, pero cu ta cuminsa den fase, cu e prome 600 cambernan. 

SCREENING

Algun siman atras, e portal aki a raporta e hecho cu e compania a pasa e screening haci, cual raportahe a keda cuestiona pa entre otro e partido politico RAIZ. Nan a cuestiona e asunto y a exigi di gobierno pa presenta y of publica e carta di VDA (Seguridad Nacional) pasobra nan no tabata kere. Pero awor ta mira cu e portal aki ta haya rason, unda cu e carta aki cu ta den poder di e portal aki, ta comproba cu e screening enberdad a sosode y tabata positivo, cu ta pone cu Banco Central awor por a otorga e permiso aki pa e compania menciona. 

 HOTEL

Cu e ultimo ‘obstaculo’ aki, tur cos ta mustra cu e prome hotel grandi lo por bira un realidad aworaki na San Nicolas, y cu segun informacion, e aña aki caba, por tin e asina yama ‘groundbreaking’ pa e hotel aki. E sitio ta mesun sitio cu anteriormente e proyecto hotelero Bahia Principe mester a bin, pero debi na continuacion di e refineria  den forma di unpgrader di CITGO, esaki a keda pega.  Por lesa e carta di Banco Central AKI.