Awor si parlamento a ricibi concepto di ley pa modifica presupuesto 2014

ORANJESTAD – Parlamento a ricibi e presupuesto modifica, cu tin cu reemplasa esun inicial di 2014. Notable ta cu gobierno no ta yama esaki ‘supletorio’ oficialmente sino e ‘ concepto ley pa modifica e concepto di presupuesto 2014’. NoticiaCla.com a compronde cu esey tabata e problema cu e lo a tarda, esta cu gobierno a insisti pa yame presupuesto supletorio, siendo cu e presupuesto mes no tabata aproba ainda. Como tal esey lo tabata un exigencia di gobernador, prome cu e manda esaki pa parlamento.  “E ley a drenta” presidente di parlamento Marisol Lopez Tromp a confirma na NoticiaCla.com diahuebs atardi laat. Segun Lopez, otro siman lo trata e ley aki den comision central, pa despues trate den un reunion publico. NoticiaCla.com a compronde cu esaki lo ta diaranson otro siman mes, unda cu lo trata tur e leynan ricibi. Lopez a confirma pues cu na tur, un total di 5 ley a yega parlamento parew. Nan ta ‘bestemmingsheffing (esun di AZV cu tin cu bira e aumento di BBO, presupuesto di IWIF (caminda), DOW, Tourism Product Enhancement Fund, y e concepto di ley pa modifica presupuesto 2014. (lesa e presupuesto aki)

Tabata diaranson ainda cu NoticiaCla.com a raporta cu e presupuesto supletorio 2014 tabata pega na gobernador di Aruba. Te cu diaranson atardi, e no a yega parlamento ainda, aunke cu prome minister Mike Eman a declara dialuna cu esey tabata e caso. “Asina mi ricibi’e mi ta laga sa” presidente di parlamento Marisol Lopez Tromp a bisa NoticiaCla.com diaranson ainda, confirmando cu e no a ricibi e presupuesto ainda. Mientrastanto diaranson anochi gobierno a manda un comunicado (cu foto) cu minister bermudez a entrega e presupuesto na gobernador siman pasa diahuebs. Como tal, e presupuesto ainda ta na gobernador, y no na parlamento. No ta conoci pakico e presupuesto ainda no a yega parlamento, siendo cu prome minister Eman a sigura cu esaki ta e caso. Mientras cu e foto ta prueba cu gobernador tin e presupuesto for di siman pasa, no por a confirma cu gabinete di gobernador si ainda e tinele.

Pa loke ta e comunicado di gobierno esaki ta bisa cu diahuebs atardi 6 di November, Minister di Finanzas Angel Bermudez a entrega e presupuesto supletorio 2014 na Sr. Gobernador Fredis Refunjol, pa esaki wordo entrega na Staten pa aprobacion despues di un tratamento publico.

“E documento aki ta basa riba e conseho di Raad van Advies despues cu Sr. Gobernador a haya un instruccion di Hulanda pa no firma e presupuesto original 2014, prome cu haci un estudio di e calculacionnan concerni. E estudio aki a keda ehecuta pa e secretariado di College Financieel Toezicht (Cft) cu tambe ta e organo encarga cu supervision presupuestario pa Corsou y St. Maarten. E minister a procesa e recomendacion di e expertonan Hulandes combina cu e ultimo desaroyonan den e finanzas publico di Aruba, pa actualisa e presupuesto original. “ e comunicado ta sigui bisa.