Polis Rasmijn: Nunca mi a entrega portofoon na Speed Andrade

ORANJESTAD – E ultimo palabra dialuna atardi di e polis Rasmijn den e caso Kini Kini 1, tabata ‘Nunca mi no a duna “Speed” Andrade un radio di polis’. Un declaracion cu el a para ariba, for di momento cu huez na comienso di e caso a confront’e cu ne den ora di mainta. E polis a refuta e acusacion cu e lo a duna un portafoon na e periodista, y a insisti cu e tabatin e radio tur momento den su poder of warda, ora cu e no tabatin’e. Cu recherché ta confronte cu datos di e GPS (Global Positioning Signal) riba e portofoon, ta hopi straño y incorecto. Fiscal sinembargo, ta para ariba cu hunto cu e declaracion di e periodista (Marko) Espinoza, e dato di e GPS ta confirma e acusacion. 

GPS INCONFIABEL

Abogado defensor di Rasmijn, Demis Illis a cuminsa na cuestiona e confiabilidad di e dato di GPS, indicando cu e forma con a haci e midimento, dificilmente por conclui cu su cliente a duna e portofoon na un persona. A yama e informacion di e GPS como ‘no preciso’, y a conclui cu e acusacionan contra su cliente como tal ta ‘demasiado straño’ (te bizarre), y ta yama e metodo ey como medio inconfiabel pa por castiga su cliente. ‘OM kier pretede loke no ta cuadra’, Illis a bisa, y como tal a pidi absolucion pa su cliente. Esaki no obstante cu periodista Marko Espinoza a declara durante su interogacion (y a confirma esaki den corte dialuna) cu riba ordo di ‘su hefe’ Speed, el a debolbe e radio na Rasmijn. Manera inicia cu e raportahe aki, Rasmijn a para ariba cu e nunca no a topa Espinoza sino siman pasa pa casualidad ora cu el a bishita abogado Lejuez. Pues e informacion ey, no ta cuadra. Huez ta dicta sentencia dia 15 di juli pa 8:15pm. NOTA: CONTRARIO NA E DOS PERIODISTANAN ENVOLVI DEN E CASO, TA TAPA CARA DI E POLIS AKI YA CU E TA UN SOSPECHOSO Y NO A WORDO SENTENCIA PA UN HUEZ. ESAKI TA E POLITICA DI E PORTAL AKI, CU TANTEN CU UN PERSONA NO TA SENTENCIA, Y CU E NO TA FIGURA PUBLICO, TA TAPA SU CARA. PERIODISTA, ARTISTA Y POLITICONAN TA CONSIDERA FIGURA PUBLICO Y COMO TAL NAN NOMBER Y POTRET NO TA WORDO TAPA.