Lejuez: Caso contra dos periodista tin tinte politico

ORANJESTAD – E caso di portofoon perdi, conoci como e caso Kini Kini 1, mester wordo mira cu wowo Arubiano, pa asina por compronde e contenido. Asina abogado defensor di periodistanan Nelson “Speed” Andrate y Marko Antonio Espinoza, Chris Lejuez a bisa den su defensa dialuna atardi. Ta trata di e caso unda cu e dos periodistanan ta wordo sospecha di a haya of malversa un portafoon di polis, y a usa esaki tambe pa suministra informacion policial na otronan. Ambos tabata deteni brevemente durante curso di e caso. Pa loke ta e indicacion politico, e abogado ta referi na e contexto den cual e caso aki a origina. Esta cu e ta uno politicamente motiva, unda cu ta ‘target’ solamente su dos clientenan, pasobra nan ta prensa di ‘oposicion politico’. Fiscal na su turno a desmenti esaki categoricamente, y a mustra cu nan ta independiente y no ta aprecia e ‘tinte’ politico di cual nan ta wordo acusa.

DEFENSA

Lejuez a cuminsa na pone e idea di noticia di polis den contexto. Entre nan, comparando e situacion cu paisnan den exterior unda cu adkisicion di noticia di polis ta lo mas normal. A te hasta referi na applicacionan cybernetico gratis, cu cual por scucha noticia di polis sin ningun problema. De hecho e aplicacion mas popular a wordo ‘gedownload’ mas cu 25 miyon biaha. Tambe e informacion cu polis ta usa via e portofoon, ta di un nivel di confiansa hopi abou. Pa tur otro asunto mas grave di polis, ta usa sea otro frecuencia y of otro forma pa comunica cu otro. Pues si ta asina mes cu tabatin uso di radio, esaki no a pone bida di hende na peliger.

DUDA

A mustra cu tin hopi duda den e investigacion haci, y e forma con e prome parti a tuma lugar di e recherché di inicial L. E tabata un investigacion dirigi riba un solo periodista, esta Marko Espinoza, y a bay dirigi riba dje, politicamente motiva. A usa e señal di GPS unda cu a busca por lo menos 4 caya den vecindario di Espinoza, pa localisa su cas y e posibel portofoon. E tin duda den declaracion di e polis Rasmijn, den sentido cu e no ta cuadra, cu ta haci cu e investigacion no ta uno completo. Na comienso a mustra cu e no ta bay hunga politica cu e investigacion, pero despues di cu fiscal Gerritsen a bisa cu e por hinca man den candela pa un di e recherchenan cu a conduci e investigacion (Lejuez a purba cuestiona e credibilidad di e recherché den e forma con a interoga Espinoza), Lejuez a cambia su strategia y a presenta un prueba cu ta mustra cu definitivamente tin un tinte politico. Ta trata di un post di actual minister Otmar Oduber contra e caso aki, unda cu e prome ‘LIKE’ di e post, tabata netamente di e recherché aki. Pues cu ta indica cu e ta simpatisa e mandatario, cu ta un contrincante serio di e cliente di Lejuez, esta Andrade. Na su defensa, e fiscal en cuestion a bisa cu e no ta wak con un simple ‘Like” por tin un indicacion asina y cu e ta  keda para ariba cu e recherché aki ta integro den su trabou.  Na final, Lejuez a pidi absolucion pa ambos di su clientenan, y si no ta absolucion (vrijspraak), no duna un ni un castigo condicional ni tampoco un castigo di prizon. Huez ta dicta sentencia dia 15 di juli pa 8:15am.