Instancianan gubernamental y priva violando ley nobo di bandera di Aruba

ORANJESTAD – Hopi instancia gubernamental local y priva no ta cumpliendo cu e ley nobo di bandera di Aruba. Di otro banda, varios instancia gubernamental hulandes, si mesora a adapta nan bandera pa esun ‘corecto’ segun reglamento nobo di e ley cu a pasa dia 23 di september ultimo den parlamento. For di dia 4 di november ultimo cu e ley a drenta na vigor, un di e promenan cu a adapta e bandera tabata gabinete di gobernador. Pero lugarnan manera Bestuurskantoor y Parlamento mes, ainda tin e bandera ‘bieu’ colgando tur dia. Mescos ta conta pa varios instancia priva, manera hotelnan, y otro lugarnan priva.

For di presidente di parlamento, Marisol Lopez Tromp, NoticiaCla.com a compronde cu e ta na altura di esaki y cu “nos tin cu cambie”. Otronan cu NoticiaCla.com a check cune, no por a duna un motibo pakico ainda e bandera ‘nobo’ no ta colgando. Otro lugar cu tambe no ta cumpliendo cune ta algun hotel, y e propio edificio unda cu Aruba Tourism Authority ta ubica. No ta conoci tampoco si esnan cu no ta cumpliendo, ta violando e ley caba, of si tin un periodo di gracia pa por haci e cambionan necesario pa e bandera wordo cambia. Riba e combinacion di potret por mira entre otro, e bandera manera cu e mester ta, lugarnan cu ainda tin e bandera robes, y esnan cu si a cumpli cu e cambio mesora.