E caso di portofoon y periodistanan y polis envolvi ta dialuna awor

ORANJESTAD – E dos periodistanan Nelson A, y Marko E. hunto cu agente policial Rasmijn, tin cu responsabilisa nan mes dilanti mesa berde dialuna awor, pa e caso penal di portofoon di polis. Tanto A como E  ta wordo acusa di a intencionalmente haci doño di portofoon di Cuerpo Policial di Aruba, conhuntamente cu un otro of otronan, den e periodo di prome di januari 2015 te prome di november 2018. Ademas nan ta wordo acusa di a intencionalmente, conhuntamente cu un otro of otronan, den e periodo di prome di januari 2015 te prome di november 2018, y cu uso di hermentnan tecnico (portofoon di Cuerpo Policial di Aruba y/of computers y/of microfono den e computers y/of aplicacionnan di software of app instala den e computers y conecta cu telefonnan celular) a tap informacion cu no tabata destina na nan y cu tabata encera comunicacion entre polisnan y miembronan di Cuerpo Policial di Aruba. Pa loke ta Rasmijn, esaki ta wordo acusa di, como agente policial, a intencionalmente haci doño di portofoon di Cuerpo Policial di Aruba den e periodo di prome di januari 2015 te prome di november 2018, conhuntamente cu un otro of otronan. 

INTERES

E caso a hala hopi atencion aña pasa, mirando cu ta trata di periodistanan, cu ta pone cu medio di Aruba a duna e caso aki ora di e.o. e detencionan breve y e proceso mucho mas atencion cu normal. Mescos ta e caso dialuna awor unda cu un biaha mas e interes ta grandi pa mira den ki direccion e caso aki lo bay. Esaki pasobra e por crea un precedente y of establece un punto di discussion riba con ta maneha suceso den futuro, y si ministerio publico a actua corecto. E caso ta programa pa cuminsa 8:30 dialuna mainta awor. NoticiaCla lo ta cubriendo e caso pues keda pendiente pa e cobertura di e caso interesante aki.