5 gremio comercial ta sostene ley di BBO di parlamentario

ORANJESTAD – For di Camara di Comercio, a sali un comunicado diabierna na nomber di cinco gremio commercial pa cu e asunto di BBO. E gremionan commercial ta AGA, AHATA, AJA, ATSA, y KvK. Segun e comunicado, gremionan comercial menciona ta mustra nan apoyo pa e propuesta di ley di Parlamentario cu ta rekeri pa e impuestonan BBO/BAZV y BAVP keda aparece riba e recibonan. Nan ta referi na e propuesta di ley presenta pa Parlamentario di partido MEP, Daphne Lejuez.  “Ayera un miembro di Parlamento a tuma e iniciativa y a entrega e propuesta di ley importante aki. E gremionan comercial ta haya importante cu tin transparencia den e prijsnan y ta admira e iniciativa di e parlamentario aki pa tuma e paso aki. Di e forma aki tambe ta mustra comprension no solamente cu sector priva pero cu pueblo tambe” e comunicado ta sigui bisa. 

Segun e comunicado, e comerciante semper a bisa claramente cu ta importante pa e impuesto wordo menciona riba e recibo y pa tin transparencia pa tur hende por wak cuanto ta cobra pa omzet di servicio y cuanto pa producto. Kitando e impuestonan aki for di e recibo ta trece desconfiansa y ta haci cu Aruba lo mustra di ta bira mas caro. Tampoco por sa definitivamente cuanto a hisa e prijs pa cubri gasto di BBO/BAZV y BAVP. E impacto ta afecta turismo y imagen di Aruba y lo crea e impresion cu costo di bida na Aruba ta mas halto. Tanto local como turista ta indica esaki caba.

Pa tal motivo gremionan representando comerciante ta apoya e esfuerzo pa draai bek e decision tuma den Parlamento na december pa kita e BBO for di recibo y pone den prijs. E gremionan pues cu ta para tras e iniciativa di propuesta di ley di e miembro di Parlamento ta: AGA, AHATA, AJA, ATSA, y KvK.