CAFT a menasa Aruba cu conseho pa aanwijzing!

ORANJESTAD – E presidente di e Colegio di Supervision Financiero di Aruba (CAFT) a menasa gobierno di Aruba cu un conseho pa un aanwijzing den un carta e siman aki. Den e carta di tres pagina, fecha 20 di juni 2019, CAFT ta duna gobierno 7 dia pa informa con tin pensa di inclui su recomendacionan pa drecha e presupuesto 2019. Di otro forma, CAFT lo raporta na Rijksministeraad (RMR), cu un conseho motiva pa duna Aruba un instruccion (aanwijzing). E carta di CAFT ta un reaccion riba e reaccion di minister di Finanza Xiomara Maduro riba e Uitvoeringsraportage # 1 pa 2019. Den un reaccion cortico, e mandatario di Finanza Maduro a bisa solamente "Mi ta bezig cu e contesta pa CAFT. Mi no ta bay reaciona den prensa riba esaki", y a priminti cu despues e lo reacciona mas extenso. 

RECOMENDACION

Segun e ultimo carta,  ‘CAFT ta constata cu e mandatario no tin intencion di sigui un serie di recomendacion di CAFT’. Asina e carta ta sigui bisa. “Pa un serie di otro recomendacion, CAFT ta establece cu e minister no ta suficientemente cla riba ki forma y con leu lo sigui na e recomendacionan aki”. CAFT ta sigui haci mencion di 6 recomendacion, di cual segun CAFT, sea e minister no ta contesta mes of reacciona mes,  of den otro caso ta duna insuficiente clarificacion di con e lo implementa e recomendacionnan bisa. 

DEADLINE 

Basa riba tur esaki, e mandatario a haya 7 dia tempo, te mas tarda 28 di juni 2019, y si e contesta di minister no ta na agrado di CAFT, CAFT lo avisa RMR y conseha pa duna Aruba un instruccion. Ta mas probable cu esaki lo por cay e ora riba 5 di juli 2019, riba cual fecha tambe RMR mester dicidi si ta duna Corsou tambe un instruccion (aanwijzing).

E LEY NOBO

E situacion aki ta bira uno interesante, mirando cu ta apenas 2 siman pasa Parlamento a pasa un ley cu ta 'schakel uit' RMR y ta netamente traha pa evita cu CAFT por recomenda un aanwijzing via RMR. Pero e realidad ta cu dos siman despues, e ley ainda no a keda firma pa gobernador y gobierno, pa cual e no por drenta na vigor. De hecho, e ley ta den discusion awor entre gobierno di Aruba y RMR pa cual diahuebs ultimo Aruba y Hulanda a trata e tema aki. Mientrastanto, e ley 'bieuw y e protocol di 2018 ta keda na vigor pa cual CAFT por actua ainda conforme esaki. Pues pa falta di a actua y pone e ley nobo den funcionamento, CAFT ta keda cu e poder cu kier a kita di nan, dunando nan e 'ultimo palabra' toch. Tabata siman pasa ainda cu CAFT a anuncia cu debi na e desaroyo nobo cu pasamento di e ley nobo, nan (CAFT) no ta kere cu ta prudente pa nan biaha mas pa Aruba. E intencion tabata pa bishita Aruba comienso di otro siman. Por lesa e carta ultimo di CAFT AKI.