Ministerio publico lo no persigui gezaghebber di Bonaire

KRALENDIJK - Ministerio publico na Bonaire a dicidi cu no lo persigui gezaghebber di Bonaire. Den un comunicado, e mandatario mes a informa cu manera Ministerio Públiko a anunsiá esaki tambe diahuebs. “ Fiscal a dicidi pa sepone incondicionalmente e caso caminda mi tabata sospechoso. Esaki ta nifica cu lo no persiguí e compania Bon Recycling ni ami komo director doño di e tempu ey”.

GRADECIDO

Segun e mandatario, e ta gradesido cu e investigacion a terminá lihe y cu e resultado aki e por continua su trabou como gezaghebber di Boneiro. “ Ya mi a informá Secretario di Estado di Asunto Interno i Relacion den Reino, lidernan di fraccion di Conseho Insular y Kolegio Ehekutivo di e desicion di Ministerio Publico, Rijna a finalisa bisando.

E CASO

Rijna a informa cu dia di 12 di juni proximo, e lo a wordo interoga pa RijksRecherche, relaciona cu un caso di investigacion Caldera. Ta trata entre otro di un investigacion cu tin di haber ku iregularidadnan na e servisio DROB cu otorgamento di tereno i falsificashon di dokumento. Den e caso aki ta trata di dos ambtenaar di OLB, ku Ministerio Publiko a considera  como sospechoso, despues OLB a termina nan relashon di trabou. “Un di e dos personanan aki  a hasi denuncia contra mi persona. E denunsia tin di haber cu un petishon pa un tereno den erfpacht cu mi a hasi na 2013. E tempo ei como director i doño di e compania Bon Recycling B.V., mi a haci petishon pa un pida tereno den erfpacht i pa construcion i resiklahe despues riba e tereno. Segun e persona cu a haci denuncia e petishon aki lo no a cana segun prosedura” Rijna a bisa. Rijksrecherche kier investiga  esei awor. “Mi ta convenci cu mi a actua corecto i tin confiansa den e combersacion cu mi lo bai tin ku Rijksrecherche. Naturalmente lo mi duna tur mi cooperashon na esaki” Rijna a bisa. Lesa e declaracion completo AKI.