Aruba y Hulanda lo papia cu otro riba ley di LAFT awe

ORANJESTAD/ DEN HAAG – E situacion cu Parlamento a hinca e colegio di supervision financiero (CAFT) aden cu cambio di ley di LAFT, ta preocupa secretario di estado Hulandes Raymond Knops. Asina e portal Hulandes Koninkrijksrelaties.nu ta raporta diahuebs. Mientrastanto, gobierno di Aruba lo tene un video call cu secretario di estado Hulandes Raymond Knops riba e tema di LAFT. Asina minister di Finanza Xiomara Maduro a confirma durante un conferencia di prensa. E intencion ta pa durante e video call aki, haya claridad riba con Hulanda (lesa:RMR) ta interpreta e cambio di ley di LAFT di dia 6 di juni 2019. Hulanda, formalmente no a reacciona na Aruba, pero si den Tweede Kamer e siman aki.   

REACCION KNOPS

Segun e portal Hulandes, e declaracion di Knops na e commission di Tweede Kamer riba relacionan di Reino, tabata diplomatico, pero cu palabra sigur. “E desmantelacion di e supervision financiero, den combinacion cu e debe halto di gobierno ta casi iresponsabel. E situacion aki ta preocupami. Riba esaki e ultimo palabra no a wordo bisa ainda” Knops a finalisa bisando. 

BOSMAN

Mientrastanto miembro di Parlamento Hulandes Andre Bosman a bisa ‘Palabracionan cu Aruba no ta wordo cumpli cune. Nan ta bisa semper, ‘nos ta bay haci’e’, pero despues no ta cumpli. Ta papia de hecho di falta di boluntad gubernamental. De hecho, no ta papia mas di supervision financiero”. Ademas, a mustra cu sin e supervision, esaki por tin consecuencia internacional financiero pa Aruba.