Turistanan ya tin Aruba como alternativa pa Rep. Dominicana

ORANJESTAD – Turistanan Mericano a cuminsa mira Aruba como alternativa pa Republica Dominicano, cu no ta pasando den su miho momentonan. Aruba sinembargo, tin otro pensamento, y no tin pensa di actua ‘activo’ riba esaki. E siman aki a bira conoci cu di 9 turista (Mericano) a muri recientemente riba Republica Dominicana. CEO di ATA, Ronella Tjin Asjoe a bisa den e programa NoticiaCla LIVE riba Facebook di e portal, cu no ta necesario awor pa haci ‘un extra push’ pa e mercado ey. 

DIFERENTE CU HORCAN

“Nos no ta bay haci nada extra”, e hefe di turismo a bisa, riba pregunta si Aruba tin pensa di move riba esaki. Den pasado, ora cu otro islanan a sufri pa efecto di horcan, a probecha pa mercadea Aruba extra pa haya e turistanan ey. Algo cu awor lo no ta e caso. 

TENE CUIDAU

Segun Tjin Asjoe, no tin e necesidad pa extra turista aworaki, pasobra ‘no mester di e extra push’. “Mester bay cu hopi cautela, pasobra como marca, como destino, bo no kier posiciona bo mes asinaki” Tjin Asjoe a bisa. Segun e autoridad riba turismo, e ta mustra cu bo no tin consideracion of empatia cu otro. “Esey no ta Aruba tampoco. E no ta un bon refleho di bo marca” Tjin Asjoe a finalisa bisando. 

TURISTANAN MERICANO

Turistanan Mericano mientrastanto tin otro bista.  " Nos ta pensando riba Aruba y Cabo y porta Bahamas” e Mericano Askew a bisa na un medio Mericano. “Cualkier otro lugar cu no ta Republica Dominicano”.  Un agente di biahe Mericano, Jennifer Gabriel a bisa cu hendenan ta cancelando nan biahe completo. E ta maneha e compania Absolute Dream Vacations. Ta trata di vacacionan completo cu ta balora na entre 20 pa 30 mil dollar. Placa cu e agencia ta perde ora cu e turistanan cancela. Drone picture di NoticiaCla.