Wever: Gobierno deliberando cu RMR riba ley di LAFT

ORANJESTAD – Prome minister di Aruba Evelyn Wever Croes  a confirma e noticia di NoticiaCla diamars mainta, esta cu Gobierno di Aruba ta deliberando actualmente cu Rijksministerraad (RMR) kico ta e proximo paso despues cu Parlamento a pasa e ley di LAFT. Tabata den e programa na HITS 100FM mainta tempran cu e moderador Aldrich Croes den ‘Entrevista di Dia’,  cu e tema a bin dilanti. “Nos ta den deliberacion (si) cu RMR riba esaki pasobra esey ta loke nos a palabra” Wever a bisa Croes den e programa. Esaki ta kita speculacion pakico e ley no a keda firma ainda, manera mester ta e proceso. Y den un raportahe anterior, NoticiaCla a ilustra kico ta loke ta pasando. Awe, gobierno pues a confirma esey. 

PALABRACION

Durante e programa na HITS 100 FM, varios punto interesante a bin dilanti riba e tema di LAFT. Uno ta unda cu e mandatario a confirma tambe na e moderador Aldrich Croes, cu e palabracion cu (Gobierno di ) Aruba tabatin cu Hulanda, ta pa cambia solamente e normanan y e limitacion di miembrecia di e conseho consultativo. “Pero Parlamento a bin cu cambionan substancial. No den norma (solamente) sino adicional”. E intencion di gobierno tabata pa haci e cambionan aki mucho mas laat, na final di e termino di CAFT, pa asina ‘overhaul’ henter e ley prome cu instala e ‘begrotingskamer’. Ademas Wever a confirma e compromiso cu Hulanda, esta di kico lo a pasa despues cu Parlamento aproba e ley cu e cambionan presenta segun e amienda. “Ora cu cambionan pasa, nos ta delibera cu RMR riba dje. Y nos ta den e fase ey” Wever a sigui bisa.  “No ta cuestion cu nos no tin pensa di firma of algo asina” Wever a bisa. Loke el a bisa despues tabata interesante tambe, ,ora cu el a puntra si e mes tambe mester ta  co-firmante di e ley. Manera ta conoci, pa e ley drenta na vigor, tanto gobierno como Gobernador di Aruba mester firma esaki. Sinembargo e mandatario no tabata sigur di esey. “Mi no sa tampoco si nos mester uberhaübt firma of algo”. 

INTERVENCION DI HULANDA

Tambe loke e mandatario a confirma cu despues cu Parlamento a haci e cambionan, cu Hulanda por interveni mas facil awor, compara cu antes. Esaki pasobra segun e cambio, e unico forma cu Hulanda por haci esaki awor ta segun Statuut. Y no mas segun e ley di LAFT, cu tabata henter un otro procedura, unda cu gobierno por a bringa e eventual intervencion. RMR por interveni aworaki si nan ta haya ta necesario y ta keda na nan pa dicidi esey. 

BEGROTINGSKAMER

Wever a haci mencion tambe di e parti di protocol unda cu Hulanda ta admiti cu den e constelacion di e begrotingskamer, cu Hulanda, contrario cu awor, lo no tin un miembro aden, ‘pa e bien di’ e autonomia administrativo di Aruba. “Hulanda a a bisa met zoveel woorden cu nos no kier tin ningun miembro di Hulanda aden” Wever a sigui bisa. 

CANCELACION DI CAFT

E hecho cu CAFT a cancela nan biahe pa Aruba programa pa otro siman, a cay como sorpresa pa Wever tambe. “Mi tambe ta haye incomprendibel pasobra nada no a cambia pa CAFT. Segun Wever, CAFT ta suppose di controla y haci su supervision pa Aruba. “CAFT ta un lands organ, cu tin cu traha pa gobierno y Parlamento. Wever a admiti cu e ta haya cu CAFT a actua politicamente cu nan decision di no biaha mas pa Aruba. Por scucha e parti di entrevista riba LAFT cu Aldrich Croes AKI.