Ola tropical por afecta tempo di Aruba cu awacero pa diamars

ORANJESTAD - Den proximo 24 ora, humedad den region lo bai combina cu inestabilidad ocasiona pa un ola tropical cu na e momentonan aki situa den parti oost di Caribe i ta moviendo west. Asina Servicio Meteorologico ta raporta dialuna atardi.  Esaki lo bai causa momentonan cu hopi nubia y pa e motibo aki por spera localmente algun awacero breve. No por exclui un posibilidad chikito di lamper cu strena.

Di otro un banda por bisa cu e diferencianan di precion di aire den region ta grandi, causando un biento fuerte y de bez en cuando hopi duro den rafaga. Pa e motibo aki un alerta pa biento fuerte i lama localmente bruto ta na vigor te cu otro aviso.