Gobierno no a firma e ley di LAFT ainda pero tine wanta

ORANJESTAD – E ley nobo di LAFT cu Parlamento a pasa dia 6 di juni ultimo, ta na Gobierno ainda sin cu a firma esaki. Riba su mes, nada inusual pasobra ‘ta tuma entre 1 pa 2 siman pa Gobierno ‘ratifica’ (bekrachtig) e ley. Asina NoticiaCla a saca afor di investigacion haci riba e tema. Speculacion pakico e ley no ta firma ainda, ta hopi sinembargo. Pero informacion cu e portal aki tin, ta cu Gobierno lo kier warda kico Rijksministeraad ta haci dia 5 di juli proximo. Hulanda formalmente no a reacciona ainda y manera cu e protocol di LAFT tabata bisa, ‘RMR mester aproba e ley prome cu e drenta na vigor’. Algo cu Parlamento a cambia, pero cual cambio no a drenta na vigor ainda. 

CONCEPTO

Manera ta conoci, e concepto di ley original a cambia practicamente completo. Como tal e concepto cu tin awor ariba mesa ta esun manera cambia door di Parlamento via e amienda. Parlamento tin e derecho pa cambia conceptonan di ley entrega na nan door di Gobierno (recht van amendement). Unabes cambia por medio di un amienda e concepto manera cambia, ta sigui. Esey ta nifica cu ta ariba esey siguientemente mester dicidi si ta ‘ratiica’ (bekrachtig) e ley of no.  

RATIFICACION

Manera cu e portal aki a compronde, un scenario ta cu Gobierno por pidi Raad van Advies conseho si por ‘ratifica’ (bekrachtig) e concepto manera cambia door di Staten, ya cu esaki ta hopi diferente na esun cu Gobierno a entrega na Parlamento y ariba cual Raad van Advies a ser scucha. A haci Gobierno e pregunta kico ta e status di e ley pero no a haya reacciona ainda. A confirma si cu e ley no a wordo publica ainda pa medio di un ‘Afkondigingsblad’, pues esey kier men cu e no a wordo firma. Ta na momento cu un ley wordo publica bo por bisa cu e ta na vigor. Na 2014, ora cu a bin tardansa pa firma e presupuesto di 2014 den un ley, a bin compronde cu e tabata pega na e Gobernador di e tempo ey, cu a dicidi pa no firm’e manera cu e tabata.