Aruba ta pasa pa quarter finals su Beach Tennis World Championship

ORANJESTAD - Actualmente ta tumando lugar e “Beach Tennis World Championship 2019” na Terracina Italia, caminda tin algun di nos hungadornan local participando. Entre nan nos tin Aksel Samardzic, kende a forma ekipo cu Ramon “ Nacho” Guedez, sigur un persona no desconoci den e deporte di Beach Tennis na Aruba. 

Durante e prome ronde Aksel y Ramon, mester a enfrenta un tremendo ekipo di Italia, Diego Bollettinari, ranked 23 di mundo y Marco Faccini, ranked 25 di mundo. Durante un tremendo wega, cu a bai 3 set, Aksel y Ramon ta sali vencedor y asina aki pasa pa e segunda buelta. Mester remarca cu Aksel actualmente ta number 22 y Ramon number 14 riba e ranking mundial.

Ayera, 13 di juni, Aksel y Ramon a enfrenta un duo hopi mas fuerte, cara nan conoci sigur na Aruba, cual nan ta Marco Garavini y Luca Meliconi. Nan ranking mundial respectivamente ta 11 y 78. Aksel y Ramon a logra gana den 3 set, un wega cu a dura un tiki mas cu 2 ora, cualnan a termina cu e score di 2-6 / 6-4 / 6-3

Cu e victoria aki, awe diabierna, pa 9or PM (ora local na Italia) nan lo ta hungando quarter finals contra un otro ekipo di Italia, Alessio Chiodioni y Mattia Spoto. Un punto sigur na fabor di e italianonan ta cu nan ta hungando na cas, pero nos ta sigur cu Aksel y Ramon tin nan fans nan tur rond di mundo. Durante dia por wak update riba e facebook page di Beach Tennis Aruba. Pa esnan cu kier sigi e wega aki live, por live stream via di https://www.beachtennisterracina.it/.