Minister Hooyboer: Reina Beatrix School ta keda cera

ORANJESTAD – Decision a cay cu definitivamente Reina Beatrix School ta keda sera. Desde e prome dia cu Reina Beatrix School a informa Minister di Enseñansa Michelle Hooyboer-Winklaar di desaroyonan menos bon na e edificio, e mandatario a reuni cu diferente departamento concerni y a haci e sondeo necesario cu a conduci na un decision urgente. E resultado ta pues esun conoci: Reina Beatrix School lo keda sera permanentemente pa renobacion.

“Siguridad y salud di alumnonan y maestronan ta mi prioridad y tur decision cu mi tuma ta basa riba esaki” Hooyboer-Winklaar a duna di conoce. E punto di urgencia pa cual Departamento di Enseñansa y DOW a traha duro pa soluciona, ta inclui e sospecho di por tin asbest den e tegelnan di scol. Testnan a confirma esaki y ta pa e motibo aki cu Minister Michelle Hooyboer-Winklaar como Minister di Enseñansa a laga cera e scol y ta inicia cu un plan di accion pa desmantela e tegelnan y bay over na restaura e scol den su totalidad.“Tanto testnan haci di e tegelnan y tambe di e aire a bolbe bek negativo, esey ta nifica cu no ta keda mi nada otro cu di pensa riba solucion pa e preocupacion di e docentenan, alumnonan y mayornan”, asina e mandatario a duna di conoce.

Mayoria scol na Aruba ta di 50 of 60 aña bieu y un cantidad di nan no a conta riba renobacion pa hopi tempo. Aki sigur ta inclui Reina Beatrix School y tambe Juliana School. “Asbest ta peligroso na momento cu esaki kibra. Nos a pasa dor di un situacion similar na un otro scol y sa precisamente cual pasonan mester wordo tuma”, Minister Michelle Hooyboer Winklaar a sigui elabora.

Ya caba tin diferente posibilidad y opcion pa crea espacio temporal pa e alumnonan, y decision lo ser tuma den termino di dia pa sigura continuacion di educacion di e muchanan. E lesnan mester sigui semper en cuando cu e salud di e maestro y e docente ta salvaguardia. “Nos ta reuniendo tras di otro pa yega na un solucion mesora, pa por lo menos den fin di siman por cuminsa muda e scol si ta posibel”, asina e mandatario a splica. Ceramento di un scol pa renobacion ta crea un reto grandi pa infrastructura. Pero awor mas cu nunca lo traha pa finalisa e plan pa cuminsa cu varios proyecto di mantencion y renobacion na comienso di aña 2015.

“Esaki no ta facil y lo forma un reto grandi teniendo na cuenta cu tin hopi necesidad na scolnan. Si tin trabounan cu no ta planea den nos lista, pero cu ta presenta como trabounan di urgencia, lo mester adapta e plan di accion y acerca Parlamento pa aloca mas fondo pa e trabounan necesario tuma luga”, segun e minister a splica. “Mi lo traha riba un plan retroactivo pa sigura continuacion di educacion, un educacion sano, practico y cu ta yena comunidad cu satisfaccion”, asina Hooyboer-Winklaar , dicidido y sigur preocupa a termina bisando.