RMR no a duna Corsou aanwijzing sino mas tempo

DEN HAAG – Corsou no a haya instruccion (aanwijzing) for di Rijksministerraad, y a haya tres siman tempo pa logra un solucion. Durante e RMR di dia 5 di juli proximo, e decision final ta cay. Asina RMR a dicidi diabierna mainta na Den Haag. Secretario di estado Hulandes Raymond Knops a bisa cu Den Haag y Willemstad ta papiando algun tempo caba pa stimula e economia y pa logra trece reforma riba pia. “E combersacionan aki nos lo sigui tene y ta bay traha y concretisa e acuerdo di cooperacion” Knops a bisa N.O.S. 

Segun e portal di noticia Hulandes, a papia tambe di e peticion di Corsou pa desvia di e reglanan regular di presupuesto, pasobra ta papia di un situacion particular, esta e crisis na Venezuela. Aki tampoco no a tuma un decision, aunke cu Knops a reconoce si cu e crisis ey tin consecuencia grandi pa Corsou. 

Prome minister di Corsou Eugene Rhuggenaath, cu tabata presente na e reunion na Hulanda, tabata content cu tin espacio pa continua cu e combersacionan. El a enfatisa cu su gobierno a compromete su mes na un programa di reforma duradero y structural. E ta sigur cu, cu ayudo di Hulanda, esey ta bay logra. Potret NOS.