Politica na Aruba a cuminsa sinti e impacto di cambio di LAFT

ORANJESTAD –  Mientras cu lider di fraccion di MEP den Parlamento di Aruba Rocco Tjon a reacciona asombra riba e carta cu colegio di supervision di gobierno CAFT a manda pa gobierno diaranson cancelando nan biahe pa Aruba, parlamentario pa AVP Richard Arends ta bisa cu ‘ e reaccion di CAFT tabata di spera’. Gobierno mientrastanto (lesa: minister Xiomara Maduro) ta wardando un reaccion di Rijksministeraad (RMR) y CAFT mescos. Tjon sinembargo no a warda pues, y riba peticion di NoticiaCla, AVP (lesa Richard Arends) tambe a reacciona.

REACCION

Cu e cambio di ley di LAFT siman pasa den Parlamento lo a crea reaccion, ta un hecho. E pregunta solamente tabata ‘ki reaccion’, y mas aun, di ‘ken y con’. Despues di casi un siman di warda, CAFT a reacciona cu su carta pa gobierno, anunciando cu nan ta ‘cancela nan bishita pa Aruba’. Esaki ta un consecuencia directo di e pasamento di ley di siman pasa.  NoticiaCla a raporta esaki den un articulo mas prome diaranson.  Reaccion di gobierno pa NoticiaCla a keda minimo. Segun e mandatario di finanzas, mientras cu CAFT a manda su reaccion pa gobierno, tanto di CAFT como gobierno nan siguiente paso ta depende di reaccion di RMR. 

PARLAMENTO

Manera informa anteriormente, lider di fracccion di MEP Rocco Tjon si no a warda y a bisa diaranson den un comunicado cu “awor e colornan real di CAFT ta sali”. Den e articulo Tjon ta papia di ta asombra riba e contenido. Parlamentario di AVP Richard Arends riba peticion di e portal aki, a declara cu e reaccion di CAFT tabata di spera, pasobra e ley di supervision manera aproba ta cambia e esencia di e supervision por completo y ta contrario na e spirito di loke Gobierno a palabra den e protocol.

TJON

“Cu asombro nos a tuma nota di un carta cu CAFT, sr. Gradus, a dirgi na Gobierno di Aruba. Den e carta aki nan ta señala di no lo reuni cu gobierno fin di luna pa e motibo cu e amienda di Parlamento a cambia e posicion di CAFT fundamental” Tjon ta cuminsa na bisa den su comunicado. Segun e lider di e fraccion geel, e cambio di ley “no a cambia nada na e funcionamento y of e tareanan di CAFT”. Como tal no ta compronde e postura awor di CAFT. Ademas segun Tjon, pa loke ta nos ratingnan internacional, manera CAFT mes a duna di conoce, tin 2 aspecto cu ta hunga un rol importante, cual ta; cu nos ta forma parti di Reino Hulandes (cual nada no a cambia) y gobierno mester tin e “commitment” pa atende cu e situacion financiero (cual nada no a cambia)”. 

PROBLEMA CONSTITUCIONAL

Segun Tjon, CAFT tampoco no kier compronde cu na momento cu pais Aruba, den e caso aki Parlamento di Aruba, como pais autonomo aproba un ley nacional, esaki no mester pasa Gobierno di Reino mas. “Es decir e parti aki den nan carta cu nan a dirigi na gobierno no ta cuadra cu nos constitucion y ta funciona solamente pa crea inquietud innecesario”. Tjon ta spera cu CAFT ta asumi nan responsabilidad y brinda nan consehonan na Gobierno y Parlamento y ta spera cu ‘como organo independiente ta importante pa nan no wordo influencia door di Hulanda aworaki’. Ademas Tjon ta spera cu CAFT ta respeta nos constitucion.

ARENDS Y AVP

Segun Arends den su reaccion pa NoticiaCla, gobierno a palabra eo cu RMR mester duna su aprobacion despues cu e ley pasa, dus awe nos ta wak consecuencia di esaki. “E amienda a cambia e meta y contenido di e  LAFT asina tanto cu practicamente nos ta papiando di full un otro ley. Eroneamente a conclui cu Parlamento a haña mas autoridad, pero ta lo contrario a sosode. Ademas Gobierno mester a tuma honor na su mes segun nos practicanan consitucional y entrega su retiro” Arends ta sigui bisa. “Bo por ta den desacuerdo cu e parti di instruccion den cuadro di supervision financiero a wordo delega temporariamente na RMR, pero al menos LAFT tabata stipula e condicionan y e reglanan di wega. Awor esaki no ta e caso mas” Arends ta sigui bisa.