Politica na Aruba a cuminsa sinti e impacto di cambio di LAFT

Politica na Aruba a cuminsa sinti e impacto di cambio di LAFT

Posted on 06/12/2019 6:15 pm AST | Updated on 06/12/2019 6:35 pm AST

ORANJESTAD –  Mientras cu lider di fraccion di MEP den Parlamento di Aruba Rocco Tjon a reacciona asombra riba e carta cu colegio di supervision di gobierno CAFT a manda pa gobierno diaranson cancelando nan biahe pa Aruba, parlamentario pa AVP Richard Arends ta bisa cu ‘ e reaccion di CAFT tabata di spera’. Gobierno mientrastanto (lesa: minister Xiomara Maduro) ta wardando un reaccion di Rijksministeraad (RMR) y CAFT mescos. Tjon sinembargo no a warda pues, y riba peticion di NoticiaCla, AVP (lesa Richard Arends) tambe a reacciona.

REACCION

Cu e cambio di ley di LAFT siman pasa den Parlamento lo a crea reaccion, ta un hecho. E pregunta solamente tabata ‘ki reaccion’, y mas aun, di ‘ken y con’. Despues di casi un siman di warda, CAFT a reacciona cu su carta pa gobierno, anunciando cu nan ta ‘cancela nan bishita pa Aruba’. Esaki ta un consecuencia directo di e pasamento di ley di siman pasa.  NoticiaCla a raporta esaki den un articulo mas prome diaranson.  Reaccion di gobierno pa NoticiaCla a keda minimo. Segun e mandatario di finanzas, mientras cu CAFT a manda su reaccion pa gobierno, tanto di CAFT como gobierno nan siguiente paso ta depende di reaccion di RMR. 

PARLAMENTO

Manera informa anteriormente, lider di fracccion di MEP Rocco Tjon si no a warda y a bisa diaranson den un comunicado cu “awor e colornan real di CAFT ta sali”. Den e articulo Tjon ta papia di ta asombra riba e contenido. Parlamentario di AVP Richard Arends riba peticion di e portal aki, a declara cu e reaccion di CAFT tabata di spera, pasobra e ley di supervision manera aproba ta cambia e esencia di e supervision por completo y ta contrario na e spirito di loke Gobierno a palabra den e protocol.

TJON

“Cu asombro nos a tuma nota di un carta cu CAFT, sr. Gradus, a dirgi na Gobierno di Aruba. Den e carta aki nan ta señala di no lo reuni cu gobierno fin di luna pa e motibo cu e amienda di Parlamento a cambia e posicion di CAFT fundamental” Tjon ta cuminsa na bisa den su comunicado. Segun e lider di e fraccion geel, e cambio di ley “no a cambia nada na e funcionamento y of e tareanan di CAFT”. Como tal no ta compronde e postura awor di CAFT. Ademas segun Tjon, pa loke ta nos ratingnan internacional, manera CAFT mes a duna di conoce, tin 2 aspecto cu ta hunga un rol importante, cual ta; cu nos ta forma parti di Reino Hulandes (cual nada no a cambia) y gobierno mester tin e “commitment” pa atende cu e situacion financiero (cual nada no a cambia)”. 

PROBLEMA CONSTITUCIONAL

Segun Tjon, CAFT tampoco no kier compronde cu na momento cu pais Aruba, den e caso aki Parlamento di Aruba, como pais autonomo aproba un ley nacional, esaki no mester pasa Gobierno di Reino mas. “Es decir e parti aki den nan carta cu nan a dirigi na gobierno no ta cuadra cu nos constitucion y ta funciona solamente pa crea inquietud innecesario”. Tjon ta spera cu CAFT ta asumi nan responsabilidad y brinda nan consehonan na Gobierno y Parlamento y ta spera cu ‘como organo independiente ta importante pa nan no wordo influencia door di Hulanda aworaki’. Ademas Tjon ta spera cu CAFT ta respeta nos constitucion.

ARENDS Y AVP

Segun Arends den su reaccion pa NoticiaCla, gobierno a palabra eo cu RMR mester duna su aprobacion despues cu e ley pasa, dus awe nos ta wak consecuencia di esaki. “E amienda a cambia e meta y contenido di e  LAFT asina tanto cu practicamente nos ta papiando di full un otro ley. Eroneamente a conclui cu Parlamento a haña mas autoridad, pero ta lo contrario a sosode. Ademas Gobierno mester a tuma honor na su mes segun nos practicanan consitucional y entrega su retiro” Arends ta sigui bisa. “Bo por ta den desacuerdo cu e parti di instruccion den cuadro di supervision financiero a wordo delega temporariamente na RMR, pero al menos LAFT tabata stipula e condicionan y e reglanan di wega. Awor esaki no ta e caso mas” Arends ta sigui bisa. 

 

 

 

 

  • Wever: Prematuro pa specula riba un di dos lockdown caba

    Wever: Prematuro pa specula riba un di dos lockdown caba

    ORANJESTAD – Gobierno no ta descarta un di dos lockdown, aunke ta prematuro pa specula riba esaki awor. Asina prome minister Evelyn Wever Croes a bisa relaciona cu e preocupacion di AHATA riba un di dos lockdown relaciona cu e crisis di coronavirus COVID-19. Ademas Wever ta sigura cu no ta bay usa fondonan genera pa cubri e posibel pago di seguro di biahe di turista, pa cubri deficit di AZV. Esaki tambe tabata un preocupacion di AHATA. 

  • Dialuna Lotto, restaurant paden, bar y spa’s por habri atrobe

    Dialuna Lotto, restaurant paden, bar y spa’s por habri atrobe

    ORANJESTAD – Entrante dialuna 1 di juni proximo, Gobierno ta drenta e di tres fase di apertura pa loke ta e crisis COVID-19. Asina prome minister Evelyn Wever Croes a anuncia diaranson. Esaki ta nifica cu entrante e fecha aki, lugarnan di Lotto y Catochi, restaurantnan parti paden, Koffie huis, Bar y tambe spa y massage parlours por habri atrobe. Lotto y catochi por keda habri solamente te 6’or y mei di anochi. Restaurant parti paden, bar, koffiehuis y bar mester cera mas tarda 10’or di anochi. Esaki ta conta pa cliente. Si trahadonan mester haci limpiesa, nan por keda mas laat. 

  • Awe nochi gobierno lo por anuncia fecha pa re-apertura frontera

    Awe nochi gobierno lo por anuncia fecha pa re-apertura frontera

    ORANJESTAD – Informacion cu noticiacla.com tin, ta mustra cu mas probable awe nochi gobierno lo anuncia e fecha definitivo pa reapertura di nos fronteranan. Esaki mirando cu tur cos ta na su lugar aworaki y ta hustifica e reapertura. Hunto cu esaki, manera cu e portal aki a publica tambe, hotelnan ta preparando of ta cla caba cu nan preparacion y ta wardando e momento yega pa cuminsa ricibi nan huespednan bek. 

  • Minister Lampe a sobrevivi mocion di desconfiansa

    Minister Lampe a sobrevivi mocion di desconfiansa

    ORANJESTAD – Minister di enseñansa Rudy Lampe a sobrevivi un mocion di desconfiansa contra dje algo pasa di 10 or diamars anochi. Esaki despues di mas di 12 ora di reunion den Parlamento riba e ultimo desaroyonan den enseñansa. E mocion ey tabata e prome di 5 entrega diamars mainta. For di mainta caba manera cu noticiacla.com a raporta, e mandatario a indica cu e no tabatin miedo Despues di mas di 12 ora di reunion diamars den Parlamento, Lampe, a pasa pa vota pa e mocion ey y algun mas. Esun mas importante tabata obviamente esun di desconfiansa. Pero durante tratamento di e presupuesto, tabata mustra cla cu e uniconan pa vota pro e mocion, tabata fraccion di AVP, ya cu e otro partidonan a mustra nan aprobacion sea den e forma di elogia e mandatario, of aproba parti di e maneho cu el a presenta. 

  • Lampe: Envez di para proyectonan, lo cuminsa dialoga cu docentenan

    Lampe: Envez di para proyectonan, lo cuminsa dialoga cu docentenan

    ORANJESTAD – Minister Rudy Lampe no ta mira cu e tin cu para su proyectonan di enseñansa manera cu varios parlamentario a pidi durante e reunion diamars riba enseñansa. Segun e mandatario, esaki ta pasobra awor ta bay inicia e dialogo cu esnan riba e tereno aki. Si para e proyectonan, e ora no tin sentido pa tin dialogo. Como tal e mandatario a sigura cu esaki no ta necesario. No ta conoci si esaki kier men cu mientras cu e ta dialoga, ta pone e proyectonan ‘on hold’ pa haya input di e docentenan durante e dialogo. 

  • AVP a entrega mocion di desconfiansa contra minister Lampe

    AVP a entrega mocion di desconfiansa contra minister Lampe

    ORANJESTAD – Fraccion di partido AVP den Parlamento a entrega un mocion di desconfiansa contra minister di enseñansa Rudy Lampe diamars merdia. Segun e mocion, e mandatario a viola varios decision cu e.o. Parlamento a tuma y pone nan un banda. Como tal, nan a ‘dicidi’ cu nan ta retira e confiansa den e minister di enseñansa Rudy Lampe. 

  • aruba airlines
  • Powered by SETAR