Polis bayendo accidente envolvi den accidente

ORANJESTAD - Diaranson algo pasa di 1:30pm a sosode un accidente riba Sasakiweg na altura di Super Food, den cual un patruya di polisnan di strand politie tabata envolvi. E la dal den un taxi biniendo for di Bubali, cu a lora su dilanti pa subi Sasakiweg. E patruya di Polis, aunke bayendo cu zwaai licht y sirena direccion pa un accidente na altura di Aruba Ports Authority, tabata riba Sasakiweg bayendo direccion ariba. El a purba haya preferencia na e crusada, aunke e tabatin luz cora, pero e taxi no a tuma nota di dje y como tal nan a dal den otro. E polis sinta den banda como pasahero a resulta levemente herida.

Mando Policial a presenta mesora na e sitio, pa tuma nota di e coleganan envolvi den e accidente, e taxista envolvi y e auto di polis cu a keda practicamente "total loss". Manera ta custumber, ora cu un auto di polis ta envolvi den un accidente, ta e specialistanan di trafico ta presenta mesora na e sitio pa haci e investigacion necesario.

A tuma nota di presencia di Alto Comisario mr. Dolfi Richardson na e sitio di accidente hunto cu Minister di Husticia Arthur Dowers cu tambe a bay pone su mes na altura di e accidente aki. E hefe maximo di polis a lamenta e accidente y a bisa cu esaki ta e risico di trabou. Polisnan ta pone nan mesun bida na peliger, pa por yuda otronan. Mayoria bes nan ta logra, pero tin biaha, manera esaki, cosnan por bay diferente.