CAFT ta cancela biahe pa Aruba debi na cambio di LAFT

CAFT ta cancela biahe pa Aruba debi na cambio di LAFT

Posted on 06/12/2019 2:23 pm AST | Updated on 06/12/2019 2:27 pm AST

ORANJESTAD – E cambio di ley di LAFT a conoce su prome efecto, casi un siman despues cu Parlamento di Aruba a cambia e ley cu pasonan fundamental. E colegio di supervision financiero di Aruba CAFT ta mustra gobierno diaranson riba incumplimento di e protocol firma aña pasa y ta mustra cu nan prome accion ta consecuentemente pa pospone nan bishita proximo pa Aruba. 

BISHITA 

Pa medio di un carta pa gobierno (lesa: minister di finanza Xiomara Maduro), CAFT a informa gobierno di e accion  aki. Den e carta ta specifica cu e motibo ta e cambionan fundamental di e ley, siendo cu a palabra algo otro den e protocol. Como tal CAFT ta informa cu no ta haya ‘prudente pa biaha pa Aruba awor’. Oficialmente Hulanda no a reacciona ainda, sino solamente bisa cu ‘e cambio di ley ta bou di evaluacion’. 

E CARTA

E carta fecha 12 di juni 2019 (awe) ta cuminsa bisa cu CAFT a tuma nota di e aprobacion di ley di LAFT den Parlamento di siman pasa. “Ora cu e ley drenta na vigor, e lo cambia e posicion y tarea di Rijksministerraad (RMR) y CAFT fundamentalmente”. Nan ta sigui mustra na e acuerdo cu tabatin pa medio di e protocol, specificamente e parti cu ta bisa cu ‘A haci palabracion entre Hulanda y Aruba cu e ley nobo di LAFT lo no drenta na vigor prome cu RMR aproba esaki”. Cu esaki CAFT ta señala cu esaki no ta e caso awor pues cu Parlamento (y gobierno) no a tene nan mes na e acuerdo aki. “Debi na e situacion cu a surgi, CAFT no ta mira cu ta oportuno pa sigui cu e biahe pa Aruba di diahuebs 27 di juni te cu 28 di juni” e presidente di CAFT Raymond Gradus ta sigui bisa. Lesa contenido di e carta AKI

  • Powered by SETAR