Edificio di DIMAS y DAO declara sigur pa tanto seguridad y salud

ORANJESTAD – E edificio di DIMAS/DAO a wordo declara sigur, pa tanto e structura y seguridad, como e parti di salud. Despues di un periodo cu e edificio di DIMAS y DAO a keda sera, y tur instancia a haci nan trabou y testnan, nan a haya un carta di DOW acompaña pa rapportnan di e instancia, cu ta declara cu e edificio ta apto pa uso. “ Esey ta haci cu entrante diahuebs por reanuda trabou na DIMAS. Pero pa loke ta servicio na comunidad, esaki lo cuminsa bek dialuna” e directora di DIMAS, Kathy Ruiz Paskel a sigura NoticiaCla.com diaranson atardi. Lo duna informacion despues ki ora esnan cu tin cita, por acudi bek pa esaki. Ta spera cu tur e medidanan cu a wordo tuma ta pa un solucion permanente pa e edificio y esey ta e garantia cu nos a haya for di e director di DOW”, Ruiz Paskel a sigui bisa NoticiaCla.com diaranson atardi. Clientenan cu tin cita pa mayan diahuebs dia 13 y diabierna dia 14 di November 2014, nan cita ta wordo hala pa dialuna dia 17 di November 2014. Pa loke ta DAO, e minister encarga Paul Croes, a confirma cu e ta habri diahuebs oficialmente. “Conform cu Advies di DOW director Marlon Croes, cu consehonan adicional di SVB y Pure Total IAQ Solutions, DTI/WEB ta considera cu e edificio ta sano pa personal por traha den e edificio” Croes a bisa NoticiaCla.com diaranson atardi.

Tabata siman pasa cu minister di DAO a confirma na NoticiaCla.com cu e edificio di DAO/DIMAS tabata planea pa wordo "geleverd" door di e compania Total Pure dia 12 di November . Minister encarga cu labor, Paul Croes a confirma esaki na NoticiaCla.com diamars mainta siman pasa. “Despues di un limpiesa grondig y tambe algun ahuste nan ( cu un onder aannemer) na tuberia kibra (kizas sabotea) e lugar lo keda bon” e mandatario a sigui bisa. “ Despues di esaki nos ta spera cu servicionan di ambos departamento normalisa” Croes a finalisa bisando.

Manera ta conoci, pa varios siman e edificio a wordo ‘sera’ pa trabou por a tuma lugar atrobe den e edificio pa wak kico e problema tabata, y mesora soluciona esaki. Mientrastanto e trahadonan di tanto DIMAS como DAO a keda traslada pa otro edificionan pa nan por a continua cu nan trabou diario sin cu esaki ta wordo interumpi. Tur e tempo aki, a reparti e trabou den varios edificio existente y a manda un notificacion pa tur esnan envolvi y pendiente di informacion necesario, pa e trabou no mester a pega. Segun e mandatario, ta spera cu awor cu trabounan ‘extra’ a tuma lugar, cu esaki lo mester alivia e problema pa semper, y no cu despues di algun tempo atrobe, mester bolbe sera e edificio manera a sosode den pasado recien.