Otro siman CFT ta cuminsa investiga presupuesto 2014

DEN HAAG/ORANJESTAD – Otro siman e secretariado di College Financieel Toezicht ta bin Aruba pa cuminsa cu nan investigacion riba e presupuesto 2014 di pais Aruba. NoticiaCla a haya confirmacion cu unabes cu Rei Willem Alexander firma e KB dialuna mas probable, gobernador por cuminsa cu su trabou. Sin e KB, gobernador lo no por haci nada. De hecho, nada no ta cambia, pasobra segun informacion cu NoticiaCla tin, e acuerdo original di dia 3 di juli ta netamente papia di un secretariado di CFT cu lo mester a haci e investigacion. E unico diferencia ta cu debi na e tardansa, e investigacion ta cuminsa 2 siman mas laat cu a programa inicialmente.

Diabierna na Hulanda, prome minister hulandes Mark Rutte a declara den e conferencia di prensa despues di e Conseho di Minister di Reino, cu esaki tabata e problema. “Eman a desvia di e acuerdo mutuo pa un investigacion independiente ehecuta pa e secretariado di CFT. Problema ta (manera cu NoticiaCla a raporta tambe) cu Eman no kier a acepta cu ta CFT ta haci esaki pasobra e ta relaciona esaki cu e situacion di Corsou. Y segun Eman e situacion ta totalmente diferente pues no mester di CFT.

Segun Rutte, e cambio di pensamento aki a pone cu diabierna Conseho di Minister di Reino a haye ta duna Aruba un aanwijzing. Rutte a papia di un decision duro pa duna Aruba un aanwijzing, pero a limita su mes na mas comentario pasobra esaki lo por pone e relacionnan riba mas presion cu nan ta caba. “Ta importante pa e decision di Conseho di Minister di Reino wordo ehecuta. Como tal mi tin cu abstene mi mes cu uso di palabranan mas fuerte”.

Pa loke ta premier Eman, e la declara diabierna cu su gobierno lo ”lo proteha e derecho aki di e pueblo di tur forma posibel,” Tambe el a bisa cu como Prome Minister di pais Aruba e no por permiti cu Aruba ta wordo humiya, secuestra y viola di e forma aki. Budgetrecht ta importante pasobra e ta encera un parti grandi pa cumpli cu esnan humilde di e pais aki. "Door di no firma e presupuesto, Hulanda ta kita e pan di e Arubiano, e no ta e pan cu Hulanda a traha pa Aruba, pero e ta algo cu e Arubianonan a lucha p'e."

E mandatario a splica cu diahuebs ainda e tabatin contacto cu Minister Plasterk pa informe cu e derecho sagrado di autonomia di Aruba no ta na venta y cu lo no doblega pa ningun instruccion cu ta ilegal, "y lo demostra esaki na mundo henter". No ta conoci si e ta referi aki na e bishita na Nacionan Uni cu a wordo anuncia diahuebs ultimo como un di e actonan cu e gabinete lo haci pa bringa Hulanda riba e caso di presupuesto no firma. NOTA: E foto ta di un reunion di CFT na Corsou algun tempo pasa. 

.