Fundacion Sea Bunita Sea Bo Mes Fashion Show 2019 un exito completo

Posted on 06/12/2019 10:24 am AST | Updated on 06/12/2019 10:25 am AST

ORANJESTAD - Fundacion Sea Bunita Sea Bo Mes Fashion Show 2019 a resulta di ta un exito completo, diasabra ultimo den un Renaissance Convention Center completamente yen, na unda nos muchanan special a briya hunto cu nan celebridadnan riba escenario. Tur cos a cuminsa pa banda di 7.15pm na unda nos Prome Minister Evelyn Wever-Croes a habri desfile di e tapijt cora hunto cu su modelo special Johnisha Medina realisando su soño di wordo acompaña pa nos Prome Minister di Aruba. Asina tambe tur nos modelonan special a pasa ariba tapijt cora desfilando pa e gran show. Un bon show cu un bon programa hinca den otro cu di principio te final a luci fantastico. Mester bisa cu nos muchanan, hobennan y adultonan special a gosa y briya asina special ariba e escenario. Esaki nos por a tuma nota cu nan expresion di cara y cu un smile asina grandi transmitiendo e alegria cu ta brota di nan curazon. Palabranan di elogio pa e motornan tras di Fundacion Sea Bunita Sea Bo Mes cu ta sr. Hans y sra. Marienela Geerman cu a traha incansablemente pa logra e di 4 aña di e sublime show aki. Un pabien na e mayornan di tur nos dushi muchanan y hobennan special cu a yuda y laga nan yiu participa y na un y tur cu di un manera of otro a contribui pa haci e show aki exitoso.

Bunita momento ora cu nos Prome Minister a reconoce Ilaijah Croes, nos reina di Carnaval Hubenil Aruba 2019 y tambe Shawndre Geerman cu a representa Aruba varios biaha ariba tarima internacional como hobennan di Excelencia logrando inclusion den nos comunidad.

 

  • Powered by SETAR