Gobierno: Parlamento ta esun responsabel pa cambio di LAFT

ORANJESTAD – Parlamento (di Aruba) tin cu responsabilisa su mes pa e cambionan haci na e ley di LAFT siman pasa. Esey ta pensamento di gobierno di Aruba (lesa: prome minister Evelyn Wever Croes y minister Xiomara Maduro) riba e tema aki. Asina tanto Wever Croes como   Maduro a reacciona riba pregunta di NoticiaCla riba e posibel confrontacion cu e cambio di ley por occasiona cu Hulanda. E ley di LAFT ta e base pa cual e colegio di supervision financiero ta funciona. E ley cu ayudo di e amienda presenta pa fraccionnan di gobierno siman pasa, no ta mescos cu e version cu Hulanda a aproba. Y aki ta unda cu spera posibel friccion cu Hulanda awor. Hulanda mientrastanto ‘ta studiando e resultado” di e version nobo di e ley segun e vespertino Amigoe.

WEVER

Den un serie di pregunta y contesta dialuna entre prome minister Wever y NoticiaCla, e prome mandatario a cuminsa na bisa cu e ta lamenta cu el a wordo ‘misquoted’, esta cu a cit’e robez. Segun e mandatario e no a bisa cu e no ta spera problema cu Hulanda debi na e cambio di e ley. “Mi contesta tabata cu mi no ta anticipa. Mi no ta bisa kico mi ta verwacht pasobra mi no ta bay specula na e momento aki” Wever a bisa. “Mi no a bisa mi no ta spera problema cu Hulanda” e mandatario a sigui bisa. Sinembargo, NoticiaCla a refresca memoria di e prome mandatario riba e contesta cu el a duna den Parlamento riba e tema. Eynan el a contesta “Tanten e gobierno aki tene su mes na e protocol, bo no ta suppose di tin ningun problema”. Mes momento, Wever a mustra cu “Aruba no por afford permiti keda sin cumpli cu su palabra”. Riba esaki e portal a puntra e mandatario cu si esaki ta e caso, con bin Parlamento ta cambia e ley, kibrando asina e palabracion cu Hulanda. Y con esaki ta yuda gobierno ‘mantene palabra’. Pues ki sentido tin pa tin un ley si gobierno ta tene su mes na e protocol cu ta diferente. Riba esaki Wever a contesta, “Esey ta un accion di Parlamento cu a cambia e ley. Ta na Parlamento pa contesta esey” tirando e bala den cancha di Parlamento. Por interpreta esaki tambe como si fuera a tira Parlamento ‘bou di bus’. De hecho, Wever ta bisa mas aleu cu pa gobierno nada no a cambia, “Nos (gobierno) a haci loke nos mester a haci” Wever a bisa, refiriendo cu nan a cumpli cu e cambio di normanan. Y si Hulanda kier actua, nan lo actua. Pero porta e ultimo cu e mandatario a bisa, ta loke mas ta pisa y cu ta e realidad di e situacion. Kico cu pasa, cua ley cu tin, Hulanda ta keda cu e ultimo palabra na fin di dia.  “Cu CAFT, cu LAFT of sin nan, nan (Hulanda) ta keda cu esey. Si Hulanda ta bay use of no use, mi lo ta speculando. Nos tin cu warda kico ta e reaccion di Hulanda”. 

FINANZA OF CONSTITUCIONAL

Pa loke ta e minister di finanza Xiomara Maduro, e ta para ariba cu el a cumpli cu Hulanda, door di percura pa atende su mes cu e parti financiero di e ley. Y si e cambio constitucional cu Parlamento a haci bira un problema, esey ta nan( Hulanda) prerogativo. E cambio cu Parlamento a haci, segun Maduro esta pa ahusta e ley pa loke ta e parti constitucional ta ‘nan (Parlamento) prerogativo, nan responsabilidad’ , e mandatario a bisa, tambe tirando e bala bek den tereno di Parlamento. Es mas, segun Maduro, ora cu Parlamento a dicidi cu nan kier haci e cambionan cu nan a haci, nan tin para pa nan. “Si Hulanda kier bay haci esaki un guera, entre nan cu nos ariba e parti constitucional, ta nan prerogativo”, Maduro a sigui bisa. 

CONFIANSA

Ora cu e portal aki a confronta e mandatario cu e aspecto di confiansa, el a mustra cu e no ta wak pakico Hulanda mester tin falta di confiansa cune. “Nan (Hulanda) no por bisa cu nan no tin confiansa”. Esaki pasobra segun Maduro, el a cumpli cu su parti financiero, pues no por tin ningun keho riba dje. De hecho, e no ta haya cu Hulanda por tin problema di confiansa riba e tereno financiero. “Si na banda ta bin cambio constitucional, y pesey Hulanda kier bay saca conclusion cu (nos) no ta di confia, anto e ora mi ta bisa, cua ta e problema? E problema ta esun financiero toch?” Maduro a sigui bisa. 

INTERPRETACION

Tin un asunto di interpretacion di Parlamento y Gobierno riba e tema. Gobierno ta sigui bisa cu nan ta sigui normal, y cu e cambio di ley no ta trece ‘ningun cambio’ pasobra gobierno lo sigui segun e protocol su contenido. Parlamento mientrastanto ta mustra cu e ley awor ta esun cu ta evita cu Hulanda por mete y duna instruccion manera cu tabata e caso antes. Sinembargo segun informacion cu NoticiaCla tin, e LAFT no por prohibi Rijksministerraad (RMR) di duna un aanwijzing. Si Hulanda kier duna un instruccion, nan lo no hacie a base di e LAFT, pero segun articulonan di nos constitucion. E diferencia ta cu awor, si RMR duna un instruccion (aanwijzing), Aruba no por protesta of bay den ‘bezwaar’. Esey tambe ta poni den LAFT. Si RMR dicidi di duna un aanwijzing awor cu a cambia LAFT, Aruba lo djis tin cu ‘guli manda abou’