Raad van State: No por prohibi Zwarte Piet

AMSTERDAM – E permiso pa e yegada di Sinterklaas aña pasa na Amsterdam ta legal y corecto. Raad van State (RvS) a bari e decision di corte di Amsterdam for di mesa diaranson mainta. (Lesa e declaracion di Raad van State aki). Segun RvS, e alcalde cu a pidi e permiso, no ta autorisa pa determina si e figura ‘zwarte piet’ ta uno di indole racista of no. Como tal e hecho cu corte di Amsterdam a sentencia contra esaki, no ta valido y mester wordo destrui. Esaki ta habri caminda pa cualkier yegada planea di Sinterklaas na Hulanda, y posiblemente otro paisnan den Reino Hulandes. Na Aruba e asunto aki no ta al caso segun organisadonan di e fiesta di Sinterklaas. Sinterklaas ta programa pa yega Aruba diadomingo mainta.

Corte di Amsterdam a dicta mas tempran e aña aki cu e permiso mester a wordo revisa atrobe, pasobra e alcalde mester a pone atencion na e interes di gruponan contra ‘zwarte piet’. E alcalde a bay den apelacion riba e veredicto aki. RvS no a bisa si un yegada cu zwarte piet ta discrimina of no. Si un hende kier haya un veredicto riba esey, e mester bay corte. E ora e por cuminsa un caso contra e organisacion cu ta prepara yegada di Sinterklaas.