Aruba no ta confirma como destinacion di SBMF pa 2020

ORANJESTAD – No ta sigur ainda si Soul Beach Music Festival lo tene su di 20 edicion na Aruba. Esaki mientras cu na final di e evento e aña aki, a anuncia cu ta wak tur hende bek pa e di 20 edicion, y ganadornan di pasashi e anochi final a sigura cu nan ta bin bek pa e edicion ey. Segun e organisador Mark Adkins a confirma pa NoticiaCla den fin di siman, ta berdad cu nan no ta sigur cu Aruba lo ta e cede otro aña. Di otro banda, CEO di ATA Ronella TjinAsjoe- Croes a bisa e portal aki cu partidonan ta den negosacion y no tin problema pa bisa cu Aruba ta e sitio, mientras cu ta negoshando ainda. 

PROBLEMA

Tabata e matutino Bon Dia Aruba cu a raporta e noticia prome diasabra, y ora cu NoticiaCla a acerca e organisador Mark Adkins, esaki no a sconde cu enberdad tin duda. “Nos no a tende nada conclusivo di ATA ainda, pues nos mester a manda e mensahe eyfo pa otro destinacionan cuminsa ‘bid’ pa host e evento” Adnkis a cuminsa na bisa. “Nos a ricibi oferta. ATA ta evaluando y no a firma ainda” Adkins a sigui bisa. “E localidad di e di 20 anniversario (di SBMF) ta desconoci ainda”. Ora cu a confronta Adkins cu e contesta di TjinAsjoe cu ta den negosacion y cu nan (ATA) no tin problema pa Adkins anuncia Aruba como destinacion, Adkins a reacciona “Pakico anuncia un decision prome cu a tuma e decision?”

ATA

Di parti di ATA, TjinAsjoe a confirma pa e portal aki cu partidonan ta den pleno negosacion. “Oktober 2018 a pidi nan entrega proposicion na tempo y nan a entregue apenas na April cu cambio nan basta grandi. Nos ta den proceso normal di negosha” e CEO a sigui bisa. “Ami mes a bisa Mark y e organisacion den un email riba e diadomingo di e concierto final: “in principle, I have no issue with an announcement of next year’s SBMF being made”. Cu esaki referiendo cu mi tabata dispuesto pa nan anuncia e evento pa otro anja na Aruba, mientras nos ta sigui negosha” TjinAsjoe a sigui bisa. Pues e proceso ta manera semper, y e no ta mira ningun problema. Pero berdad cu ta negoshando y tin confiansa cu tur cos lo bay bon.