Parlamento a aproba e ley nobo di LAFT y e amienda

Parlamento a aproba e ley nobo di LAFT y e amienda

Posted on 06/6/2019 8:04 pm AST | Updated on 06/6/2019 8:08 pm AST

ORANJESTAD – Cu 11 voto pro y 9 contra, Parlamento diahuebs anochi algo prome cu 7:45pm a aproba tanto e ley nobo di LAFT, como e amienda cu segun e fraccionan MEP, POR y RED ta converti e ley awor si den uno constitucional. Fraccion di AVP den su totalidad a vota contra (9 voto), indicando cu a duna Hulanda mas poder y cu awor Hulanda ta bay gara Aruba pa medio di e protocol. E amienda ta adapta e ley di tal forma cu e ta basicamente 'elimina' e autoridad di Hulanda, cu consecuencia cu CAFT awor ta raporta na Parlamento y Gobierno y no mas na Hulanda. Prome minister Evelyn Wever Croes, contestando pregunta di fraccion di AVP, a sigura cu e no ta spera confrontacion cu Hulanda, ya cu gobierno lo sigui cumpli cu e protocol firma, pues de hecho no tin motibo pa Hulanda crea problema. Unico parlamentario ausente tabata Marisol Lopez Tromp, cu ainda ta sufriendo un quebrante di salud. 

E DIA

E dia a cuminsa (porfin) pa 10’or awe mainta (fayo tecnico a stroba e reunion di cuminsa pa 9’or manera programa), unda cu varios parlamentario di MEP a cuminsa cu nan disertacion, sigui pa esnan di RED y AVP. Durante curso di dia, por a nota tension entre oposicion y gobierno, unda cu aunke den un forma mas ‘civilisa’, tabata tira palabra pa otro. E base di argumento di MEP, tabata cu AVP ta esun culpable di e situacion cu nos ta aden, y no Hulanda, y cu esaki nan ta manda un mensahe pa tur Avepista. Y cu danki na e cambio di e ley, awor Parlamento di Aruba ta haya su autoridad financiero bek tambe. Fraccion di AVP a argumenta mientrastanto cu si a kere cu antes AVP tabata esun cu a entrega autonomia di Aruba, ta net e coalision actual a haci esaki. Pues e tabata un bay bin entre berde y geel, cu na final a finalisa cu entrega di e amienda asina anticipa, di 13 pagina, pa cual AVP a pidi 30 minuut pa repasa pa nan por a haya sa e contenido. 

CONTESTACION

Tanto minister Evelyn Wever Croes como Xiomara Maduro tabata hopi breve den nan contestacionan (y no tabatin hopi pregunta), y a simplemente repasa historia y finalmente contesta algun pregunta. Entre nan, si cu e cambio di ley aki, Aruba por spera un confrontacion cu Hulanda. E pregunta ta bin a raiz di e hecho cu e concepto di ley sin amienda, tabata cu aprobacion di Hulanda y cu awor esaki ta cambia. Den pasado Hulanda a bisa caba cu unabez cu tin cu un acuerdo entre e dos paisnan, mester respeta esaki. Cu e cambio aki, por interpreta cu esaki pues no ta cumplimento di acuerdo pa cual Hulanda por hala atencion di Aruba. Wever sinembargo ta pensa (y a bisa esaki tambe awe nochi) cu contal cu Aruba cumpli cu e contenido di e protocol manera cu nan a bin ta haci, no tin ningun motibo pa Hulanda hala atencion di Aruba. Di otro banda, recientemente colega minister Maduro a bisa si cu e lo kier wak e reaccion di Hulanda unabez cu e ley pasa, mirando cu ta keda awor na Hulanda (RMR) pa aproba e ley cu a wordo aproba pa Parlamento. Lesa e amienda AKI

  • Gobierno no a firma e ley di LAFT ainda pero tine wanta

    Gobierno no a firma e ley di LAFT ainda pero tine wanta

    ORANJESTAD – E ley nobo di LAFT cu Parlamento a pasa dia 6 di juni ultimo, ta na Gobierno ainda sin cu a firma esaki. Riba su mes, nada inusual pasobra ‘ta tuma entre 1 pa 2 siman pa Gobierno ‘ratifica’ (bekrachtig) e ley. Asina NoticiaCla a saca afor di investigacion haci riba e tema. Speculacion pakico e ley no ta firma ainda, ta hopi sinembargo. Pero informacion cu e portal aki tin, ta cu Gobierno lo kier warda kico Rijksministeraad ta haci dia 5 di juli proximo. Hulanda formalmente no a reacciona ainda y manera cu e protocol di LAFT tabata bisa, ‘RMR mester aproba e ley prome cu e drenta na vigor’. Algo cu Parlamento a cambia, pero cual cambio no a drenta na vigor ainda. 

  • Gobierno evaluando paso pa controla vehiculonan UTV

    Gobierno evaluando paso pa controla vehiculonan UTV

    ORANJESTAD – Gobierno ta evaluando pa tuma paso contra e asunto di vehiculonan special tipo UTV. Esaki despues cu e fin di siman aki un biaha mas a surgi un situacion unda cu algun di e UTV (utility task vehicle) a wordo ‘malusa’ y poni den laman, cu tur e consecuencia cu esaki por tin tanto pa e vehiculo como e naturalesa. Asina minister di transporte Chris Romero a bisa dialuna mainta durante un conferencia di prensa. NO a determina ainda kico exactamente lo haci, pero ta evaluando. Entre posibilidadnan, ta pa obliga companianan cu ta huur e vehiculonan aki, pa pone un GPS riba nan. 

  • Minister no kier pa prolonga contracto di Ezzard Cilie

    Minister no kier pa prolonga contracto di Ezzard Cilie

    ORANJESTAD – Gobierno no ta desea pa e contracto di e actual director medico di Horacio Oduber Hospital, Ezzard Cilie ora cu e contracto vence na december awor. Asina minister di salud Dangui Oduber a bisa diahuebs mainta durante un conferencia di prensa. Segun Oduber, e lo informa e hunta di supervision pa tene cuenta cu esaki. Mes momento kier pa dentro di 3 luna, tin un director nobo y uno financiero, pa cual lo saca proximamente un aviso di solicitud pa esaki. 

  • Politica na Aruba a cuminsa sinti e impacto di cambio di LAFT

    Politica na Aruba a cuminsa sinti e impacto di cambio di LAFT

    ORANJESTAD –  Mientras cu lider di fraccion di MEP den Parlamento di Aruba Rocco Tjon a reacciona asombra riba e carta cu colegio di supervision di gobierno CAFT a manda pa gobierno diaranson cancelando nan biahe pa Aruba, parlamentario pa AVP Richard Arends ta bisa cu ‘ e reaccion di CAFT tabata di spera’. Gobierno mientrastanto (lesa: minister Xiomara Maduro) ta wardando un reaccion di Rijksministeraad (RMR) y CAFT mescos. Tjon sinembargo no a warda pues, y riba peticion di NoticiaCla, AVP (lesa Richard Arends) tambe a reacciona.

  • Gobierno: Parlamento ta esun responsabel pa cambio di LAFT

    Gobierno: Parlamento ta esun responsabel pa cambio di LAFT

    ORANJESTAD – Parlamento (di Aruba) tin cu responsabilisa su mes pa e cambionan haci na e ley di LAFT siman pasa. Esey ta pensamento di gobierno di Aruba (lesa: prome minister Evelyn Wever Croes y minister Xiomara Maduro) riba e tema aki. Asina tanto Wever Croes como   Maduro a reacciona riba pregunta di NoticiaCla riba e posibel confrontacion cu e cambio di ley por occasiona cu Hulanda. E ley di LAFT ta e base pa cual e colegio di supervision financiero ta funciona. E ley cu ayudo di e amienda presenta pa fraccionnan di gobierno siman pasa, no ta mescos cu e version cu Hulanda a aproba. Y aki ta unda cu spera posibel friccion cu Hulanda awor. Hulanda mientrastanto ‘ta studiando e resultado” di e version nobo di e ley segun e vespertino Amigoe.

  • Gobierno kier Marina Real yuda cuida nos frontera

    Gobierno kier Marina Real yuda cuida nos frontera

    ORANJESTAD – Gobierno kier ayudo di Marina Real pa yuda sigura frontera mas ainda cu loke cu e autoridadnan actual ta hacienda caba. Asina minister presidente Evelyn Wever Croes a bisa dialuna durante un conferencia di prensa. Minister Wever a confirma pa NoticiaCla cu e yegada di e ultimo boto cu posibel personanan indocumenta, ta motibo pa cual a dicidi pa pidi e ayudo extra. Mes momento a sigura cu no tin ningun problema cu e trabou cu autoridad actual ta haciendo y cu e ta hopi satisfecho cu e trabou actual. Ta e intencion pa firma un protocol cu Marina Real pa asina haci palabracion concreto di con e acuerdo aki mester tuma lugar, aunke no por a bisa pa ki tempo e control aki lo por keda concretisa. Riba pregunta di NoticiaCla, con kier traha hunto si recientemente tabatin un incidente entre cuerpo policial y marina Real pa presencia di mariniernan arma durante un razzia, e mandatario a bisa cu netamente pesey mester palabra cosnan concreto pa evita cosnan asina. Potret ta di e demonstracion di Marina na Corsou recientemente durante un evento entre marina di Aruba y Corsou. 

  • aruba airlines
  • Banco Di Caribe autos.1
  • Powered by SETAR