Parlamento a aproba e ley nobo di LAFT y e amienda

ORANJESTAD – Cu 11 voto pro y 9 contra, Parlamento diahuebs anochi algo prome cu 7:45pm a aproba tanto e ley nobo di LAFT, como e amienda cu segun e fraccionan MEP, POR y RED ta converti e ley awor si den uno constitucional. Fraccion di AVP den su totalidad a vota contra (9 voto), indicando cu a duna Hulanda mas poder y cu awor Hulanda ta bay gara Aruba pa medio di e protocol. E amienda ta adapta e ley di tal forma cu e ta basicamente 'elimina' e autoridad di Hulanda, cu consecuencia cu CAFT awor ta raporta na Parlamento y Gobierno y no mas na Hulanda. Prome minister Evelyn Wever Croes, contestando pregunta di fraccion di AVP, a sigura cu e no ta spera confrontacion cu Hulanda, ya cu gobierno lo sigui cumpli cu e protocol firma, pues de hecho no tin motibo pa Hulanda crea problema. Unico parlamentario ausente tabata Marisol Lopez Tromp, cu ainda ta sufriendo un quebrante di salud. 

E DIA

E dia a cuminsa (porfin) pa 10’or awe mainta (fayo tecnico a stroba e reunion di cuminsa pa 9’or manera programa), unda cu varios parlamentario di MEP a cuminsa cu nan disertacion, sigui pa esnan di RED y AVP. Durante curso di dia, por a nota tension entre oposicion y gobierno, unda cu aunke den un forma mas ‘civilisa’, tabata tira palabra pa otro. E base di argumento di MEP, tabata cu AVP ta esun culpable di e situacion cu nos ta aden, y no Hulanda, y cu esaki nan ta manda un mensahe pa tur Avepista. Y cu danki na e cambio di e ley, awor Parlamento di Aruba ta haya su autoridad financiero bek tambe. Fraccion di AVP a argumenta mientrastanto cu si a kere cu antes AVP tabata esun cu a entrega autonomia di Aruba, ta net e coalision actual a haci esaki. Pues e tabata un bay bin entre berde y geel, cu na final a finalisa cu entrega di e amienda asina anticipa, di 13 pagina, pa cual AVP a pidi 30 minuut pa repasa pa nan por a haya sa e contenido. 

CONTESTACION

Tanto minister Evelyn Wever Croes como Xiomara Maduro tabata hopi breve den nan contestacionan (y no tabatin hopi pregunta), y a simplemente repasa historia y finalmente contesta algun pregunta. Entre nan, si cu e cambio di ley aki, Aruba por spera un confrontacion cu Hulanda. E pregunta ta bin a raiz di e hecho cu e concepto di ley sin amienda, tabata cu aprobacion di Hulanda y cu awor esaki ta cambia. Den pasado Hulanda a bisa caba cu unabez cu tin cu un acuerdo entre e dos paisnan, mester respeta esaki. Cu e cambio aki, por interpreta cu esaki pues no ta cumplimento di acuerdo pa cual Hulanda por hala atencion di Aruba. Wever sinembargo ta pensa (y a bisa esaki tambe awe nochi) cu contal cu Aruba cumpli cu e contenido di e protocol manera cu nan a bin ta haci, no tin ningun motibo pa Hulanda hala atencion di Aruba. Di otro banda, recientemente colega minister Maduro a bisa si cu e lo kier wak e reaccion di Hulanda unabez cu e ley pasa, mirando cu ta keda awor na Hulanda (RMR) pa aproba e ley cu a wordo aproba pa Parlamento. Lesa e amienda AKI.