Reunion pa ley di LAFT a cuminsa den Parlamento

ORANJESTAD – Cu un retraso di un ora (pa motibonan tecnico), e reunion publico di Parlamento tan anticipa, esta e tratamento di e concepto di ley di LAFT a inicia diahuebs mainta. E reunion a cuminsa pa 10’or, cu splicacion di e presidente di Parlamento Ady Thijsen, splicando e importancia di e reunion aki. A sigui e prome orador Rocco Tjon fraccion di MEP cu tambe a duna e mesun contenido na e reunion su importancia y a yama e ley uno ‘peculiar’. E intencion ta pa durante curso di dia, e reunion cana su caminda, unda cu lo tin e session di disertacion di parlamentarionan sigui pa e contestacion di e preguntanan. Na final tin e intencion di vota pa e ley, añadiendo un amienda di parti di Fraccion MEP pa segun e fraccion, comberti e ley uno constitucional. 

THIJSEN

Den e introduccion di Thijsen, a splica cu e ta un ley diferente cu tur otro. E interes ta grandi, incluyendo Hulanda cu ta sigui e reunion aki cu hopi atencion. A splica cu mester tene cuenta cu statuut, leynan, y trias politica y tratado internacional, y duna respet na nos organonan consultative. “Awe ta un dia historico den historia di Parlamento. A splica cu decisionan tuma awe, lo tin su debido impacto riba e futuro relacion entre Hulanda y Aruba, y su funcionamento. A sigui cu e prome orador. 

POSPONE

E tratamento di e ley a keda posponi varios biaha, cuminsando for di aña pasa cu mester a pasa e ley aki originalmente, conforme e protocol firma aña pasa november. Pero otro factornan a pone cu e reunion no por a tuma lugar prome. Despues a haya e prome fecha despues cu e ley a drenta Parlamento. E prome fecha tabata 27 di mei, y despues a pospone esaki pa 3 di juni, y atrobe a pospone esaki pa finalmente 6 di juni. Finalmente e reunion a cuminsa, y ta programa pa keda trata durante curso di dia. NoticiaCla lo tin cobertura despues di e resultado di e ley.