Fundacion Bernadina cu e di 7 festival di canto diasabra awor na Brazil

BRAZIL - Miembronan di fundacion Bernadina Growell-Kock a invita un y tur pa e di 7 Festival di canto dedica na mama di Cultura Bernadina Growell-Kock recientemente. Representante di e fundacion Mervin Ras a trece padilanti cu e festival lo tuma lugar diasabra awor dia 8 di juni venidero anochi di 8pm-1 or am den Centro di Bario Brazil. 

Meta di e festival ta pa duna sosten na desaroyo di nos folklore y cultura. Tambe pa contribui na concientisacion di nos comunidad pa loke ta trata Mama di Cultura y su gran contribucion na nos folklore, cultura y arte. E fundacion a yega di organisa diferente acitividad y a coloca un relieve na Paseo Herencia. Na varios ocasion ta expone e cas pa tur hende por bishit’e. Mervin ta invita un y tur pa bin presencia e grandioso festival aki y ta gradici pa e aporte cu ta ricibi di publico y sosten y presencia di prensa.

Lena Yarzagaray Orman ta trece padilanti cu tin 28 cantante cu lo participa di cual 4 ta hoben. Lo tin 8 grupo tipico cu lo acompanja e cantantenan. Caarchienan ta obtenibel na 10 florin serca miembronan di fundacion of serca cantantenan of por yama Lena na cell.  5651145of Persey cel. 7336007.  Ruby Maduro kende ta participante na e festival a invita un y tur pa bin apoy’e y engrandece e festival mas ainda.   Sr. Chico Harms a anuncia diferente actividadnan pa celebracion dia di brazil. E anja aki lo tin 8 actividad. Dia 30 di juni tin bendemento di bolo, 28 di juli festival di cantica di caya, 11 augustus tin parada acustico den cual gruponan tipico lo toca, dia 17 di augustus lo elehi reina di chikitonan den tres categoria. Dia 24 di augustus tin eleccion di reina grandinan den tres categoria y lo corona nos pilar cultural. Dia 30 di augustus tin e parada cultural di lanterna. Dia 1 di september tin e grandioso parada folklorico cultural den cual e anja aki lo participa 13 grupo, 5 banda y 5 disco y ta birando mas grandi dia pa dia. Pa clausura celebracion di dis di brazil lo tin un show multicultural pa promer biaha dia 7 di september. Ta haci apelacion na esnan cu kier participa cu ta bonbini.  Sr. Sebastian Ras a anuncia diferente actividad e.o. dia di tata un fiesta tipico den centro di bario Savaneta, dia 24 di juni celebracion di dia di San Juan lo tin presentacion di gruponan, dia 30 di juni den Sportboys tambe lo tin in fiesta tipico. 

Sr. Roland Jansen tambe a hiba palabra. Ela trece padilanti informacion encuanto e festival di cantica di caya dia 28 di juli. Meta pa duna atencion na actividadnan di dia di brazil. Ta un festival di dos categoria, esta di cancionnan existente y cancionnan nobo. Edad ta 18 anja pariba. Tema di e cancionnan mester refleja nos cultura, custumbernan y ta pa prepara pa celebracion di dia di brazil. Ta invita tur bandanan pa inskribi te cu dia 21 di juli venidero.