Directie Luchtvaart a refuta acusacion di piloto Efi Tromp

ORANJESTAD – “Directie Luchtvaart (DCA) ta desmenti categoricamente tur e ponencianan y declaracionnan infunda di Sr. Tromp”. Den un declaracion diamars atardi, DCA ta referi na e declaracionnan di e piloto Efi Tromp cu a sali den prensa diamars 11 di november ultimo. Aki Tromp, despues di recobra su libertad diadomingo, a declara e.o. cu DCA ta complice na practica di buelonan illegal na Aruba. Tromp y mas complice a cai sera siman pasa (manera cu a keda publica den NoticiaCla.com), acusa di ta ehecuta buelonan illegal pa y for di Aruba. Despues di algun dia cu Tromp a recobra su libertad, e la bira e cuenta y tira culpa riba DCA. Segun DCA, aunke no ta nan custumber pa reacciona riba ponencianan y declaracionnan asina, pa e biaha aki ta importante pa trece lo siguiente padilanti.

Segun Directie Luchtvaart, nan ta lamenta profundamente cu Tromp ta purba atacha e bon nomber di e departamento. Ademas nan ta ‘desmenti categoricamente tur e ponencianan y declaracionnan infunda di Sr. Tromp’. “Por ehempel, contrario na loke Sr. Tromp ta insinua, di parti di Directie Luchtvaart no tin un gedoogbeleid pa loke ta trata vuelonan ilegal” DCA ta sigui bisa. E caso di Tromp ta un caso penal cu ta bou di investigacion di Ministerio Publico. “ Den interes di e investigacion nos no por bay mas profundo riba e declaracionnan sin base di Sr. Tromp y pa awor lo abstene di duna mas comentario” e comunicado ta sigui bisa.