Wardacosta: Capitan cu a trece indocumentadonan Venezolano a purba huy

SERO COLORADO – Wardacosta di Caribe Hulandes a informa dialuna merdia cu e 10 Venezolanonan indocumenta gara diadomingo anochi, a usa un yola pa drenta Aruba. Nan a informa esaki hunto cu potret di e situacion den un comunicado. Segun version di Wardacosta, a detecta un contacto anochi 10’or cu tawata nabega direccion oost di Aruba. Despues di un investigacion a resulta ku ta un boto tipo yola  cu indokumentadonan a bordo. Dor di bon colaboracion entre Wardacosta, KPA i Duana a logra detene 10 hende homber di nashonalidad Venezolano na Santana di Cacho. E capitan cu kier a hui, a dirigi su yola direccion di Venezuela. E team di Metal Shark, cu Wardacosta i Arumillers, a sigui e yola i detene e capitan. A hiba e capitan i e boto na e steiger di Wardacosta na Savaneta. E 10 indocumentadonan a ser entrega na Warda nos Costa. E caso ta den investigacion. potretnan ta cortesia di Wardacosta di Caribe Hulandes.