Apple a anuncia cu iTunes ta pasa pa historia !

LOS ANGELES – E era di iTunes ta pasa pa pasado. Asina e compania Apple a anuncia dialuna. E programa cu ta maneha e parti di musica di apple mac computers, ta stop di existi y na su lugar ta bin tres diferente applicacion di Mac cu ta Podcasts, TV, y Music. E update lo bin den e version mas nobo di e programa di operacion di e computer y telefon, esta macOS 10.15. E cambio segun Apple tin hopi sentido, y ta tumando lugar caba. Motibo ta cu e program di iTunes a bira ‘outdated’ y tabata haci e computer y telefon mas lento pa operacion. E aplicacionan nobo lo ta mas facil pa navega, compara cu iTunes. Apple Music, manera e nomber mes ta indica, ta enfoca solamente riba musica, mientras cu Podcast ta enfoca netamente riba esey. E TV app lo inclui contenido exclusivo di Apple, cu algun otro proveedor manera Showtime y HBO. Usuarionan di iTunes lo no wak un app pop up pa usa. Un iPhone of iPod lo sync pa medio di e sidebar den Finder. 

iTune CARDS 

Ta keda varios pregunta cu no a haya contesta durante e presentacion dialuna. Den un comunciado, e compania a abisa cu usuarionan lo por sigui cumpra y download musica via iTunes Music Store, pero no a bisa con largo e plataforma lo keda activo. Tambe no ta hopi cla kico lo pasa cu e asina yama iTunes gift card, y con hende lo por tin acceso na musica cu a wordo gedownload caba. Na Aruba e iTune Cards ta hopi popular pa usuarionan.