Proximo manifestacion ta programa pa dia 26 di november

ORANJESTAD – E proximo manifestacion ta dia 26 di november proximo. Un grupo cu a haci solicitud pa tene un manifestacion, ta haci esaki cu e meta, ‘pa haci uso di nos derecho di acuerdo cu constitucion”. E persona cu ta lidera e manifestacion aki ta conocido periodista Mimi Koolman Rosel. Segun Koolman a splica NoticiaCla.com, “ Como cu parlamento mester ta representante di pueblo, lo recorda nan cu 10.410 firmante ta sigui indica kico ta necesario pa Aruba haya bon gobernacion y bon maneho financiero”. Ademas kier uza e manifestacion aki pa” pueblo recorda den un marcha e idealnan di Betico Croes pasobra 26 di november ta dia cu nos ta recorda cu ta 27 aña cu el a fayece” Koolman a sigui bisa.

E ta hacie como un follow up riba e accion di firma di accion Pro Gobernador Integro, di algun luna pasa. Na e occasion ey, Koolman a logra acumula e cantidad di 10410 firma, y a manda un carta pa Hulanda pa minister Plasterk. E mandatario a contesta Koolman, y a corda nan riba e principio di bon gobernacion cu Hulanda kier pa Aruba sigui. Usando e idealnan aki, Koolman lo recorda gobierno esaki den e manifiesto cu e lo entrega na final di e manifestacion. E manifestacion lo cuminsa dilanti Juliana School, marcha bay bestuurskantoor, entrega manifiesto y bay pa Plaza Libertador Betico Croes unda cu lo recorda Betico Croes. E permiso ta pidi caba, y NoticiaCla.com a compronde cu esaki lo wordo otorga tambe.

E aña aki Aruba a conoce varios manifestacion caba. Tur tabata contra gobernacion di ARuba y tur a cuminsa practicamente mesun caminda y caba 'mesun caminda'. E ultimo tabata esun di Comision CAN, y despues lo mester tabatin uno mas di partido MEP, pero esey a wordo cancela. Tabatin indicacion cu lo no tabatin mas manifestacion, ya cu 'e efecto' lo no tabatey. Pero awor tin un manifestacion mas, programa pa fin di luna. E foto di archivo ta di un di e manifestacionan.