Entrante diamars otro siman, e placa nobo di papel ta subi mercado

ORANJESTAD – Entrante diamars otro siman, e placa di papel nobo manera presenta algun siman atras, ta drenta circulacion na Aruba. Dialuna awor Banco Central ta emiti e placa nobo di papel, pa despues dia 4 nan drenta circulacion. Ta cuminsa un proceso di varios siman y aña cu tin cu duna chens pa e cambio di placa sigui su curso manera mester ta. Importante ta cu for di diamars awor, bo por tin chens pa tin un placa di papel nobo den bo man. 

PLACA BIEU Y NOBO HUNTO

Cu e entrada di e placa di papel nobo, ta cuminsa e proceso di saca esun bieu for di circulacion mesora. Tur hende tin 10 siman pa cambia e placa bieu pa esun nobo, si nan kier use como forma di pago cu ta caba dia 11 di augustus di e aña aki. Pues durante e siguiente 10 simannan por usa dos tipo di placa di papel, combina. Despues di esey, pa dia 12 di augustus di e aña aki, no por haci pago mas cu e placa di papel bieu mas, esta serie di 2003. 

CAMBIA PLACA

Mes momento, pa un hende cu tin placa bieu (2003) y kier cambia esaki pa esun nobo, por haci esaki durante 6 luna, solamente na e banconan commercial cu lo facilita esaki. Esey ta cuminsa dia 4 di juni di e aña aki, y ta caba dia 4 di December di e aña aki tambe, esta 2019. Despues di esey, pa e proximo 30 añanan (te cu 12 di augustus 2049), por haci e cambio ainda pero solamente na Banco Central directamente, pues no mas na un banco commercial. Pues ta prudente pa haci tur e cambionan necesario pa e fechanan menciona.