Tratamento di LAFT por bira un confrontacion cu Hulanda

ORANJESTAD – Dialuna awor pa 9’or di mainta e concepto di ley di LAFT ‘nobo’ ta wordo trata den Parlamento. Mientras cu pa algun dia caba e ‘oproeping a bira conoci den Parlamento’, publicamente Parlamento a anuncia esaki riba nan pagina di Facebook diabierna mainta (awe). E ley mester tabata pasa prome cu cambio di aña, pero pa motibo di otro prioridad, no a keda cla pa haci esaki prome. E interes pa e reunion aki ta grandi, debi na e embergadura cu e resultado por tin pa cu e relacion entre gobierno di Aruba y Hulanda. 

AMIENDA

E loke ta haci e reunion aki interesante ta e hecho cu durante e tratamento di e ley aki, fraccion di MEP lo introduci un amienda cu e intencion pa percura pa e ley aki ‘cumpli cu constitucion’. Algo cu awor no ta e caso segun lider di fraccion di e partido geel, Rocco Tjon na NoticiaCla. E problema ta cu e ley manera el a wordo entrega na Parlamento, ta conforme palabracion entre gobierno di Aruba y Hulanda. Algo cu e minister di Finanza Xiomara Maduro a confirma pa NoticiaCla siman pasa. Mester a laga un punto di discussion cay, pa complace Hulanda. A admiti tambe cu e ley a wordo concipia a base di e necesidadnan financiero, y no a pone atencion riba e parti constitucional. Algo cu Parlamento kier cambia awor, y cu segun e mandatario encera, Parlamento tin tur derecho pa haci. 

LIDER DI FRACCION DI MEP

Den un comunicado specifico diabierna, Tjon a splica e parti di e amienda. “E amienda cu fraccion di MEP lo entrega lo tene cuenta cu e historia di con pais Aruba a cay bou di supervision financiero. Y esaki ta pa motibo di un “Koninklijk Besluit” (no. 204167) cu Mike Eman a haya pa mal gobernacion. Tambe den e amienda lo splica con Gobierno di Reino a faya den nan trabou di supervision. Pero e dos aspectonan mas importante ta cu tur cifra ta prueba aworaki cu Gabinete Wever-Croes ta hiba un maneho responsabel y tur documento y conseho di entre otro “Raad van State” ta splica cu Parlamento por desvia di cualkier palabracion haci entre paisnan y leynan anterior” Tjon ta bisa. Pero e ta bay mas leu. E parti cu colega di partido di Tjon (Endy Croes)  tin masha problema cu ne, e inclusion di miembro pa Hulanda den Caft esta Henk Kamp, tambe ta haya atencion. “Ex-politiconan Hulandes a forma parti di e colegio di supervision, pero no a contribui na mehora nos finanzas publico, al contrario a permiti Mike Eman pa destrosa nos pais. Pa e motibo aki lo no acepta e cambio cu Hulanda kier impone riba Aruba pa acomoda nan amigonan” Tjon ta bisa den su comunicado. 

POSIBEL CONSECUENCIA

Den e protocol cera entre Hulanda y Aruba na November di 2018, ta poni cu Rijksministerraad tin ultimo palabra y tin cu aproba e ley di LAFT nobo. Cu esaki den mente, minister di Finanza Xiomara Maduro a bisa NoticiaCla recientemente cu lo ta interesante pa wak e reaccion di Rijksministeraad riba e resultado final di e ley. Esaki pasobra e amienda ta cambia e contenido di e ley, cu Rijksministerraad no necesariamente lo kier bay di acuerdo cu ne. Y tanten cu Rijksministerraad no bay di acuerdo, e mester wordo cambia bek. Si esaki no sosode,  Rijksministerraad tin otro instrumentonan pa bringa Aruba. Esaki pa motibo cu loke ta wordo crea door di e amienda di parlamento ta netamente un situacion caminda cu e ‘waarborgfunctie’ di Reino por bin na vigor pa purba dempel e pos prome cu e baca hoga. Esaki pa motibo cu e ‘waarborgfunctie’ lo a pasa e etapa ‘samenwerking’ ya cu e acuerdo entre gobiernonan di Aruba y Hulanda no ta wordo respeta door di parlamento. Un di e siguiente instrumentonan cu Rijksministerraad por usa ta esun di un instruccion (aanwijzing). Aki tambe e situacion ta bira interesante pasobra e posibilidad di bai den protesta (beroep) contra di esaki na Raad van State - cu ta regla den LAFT - tambe parlamento kier bay elimina. 

ULTIMO REMEDIO

Di otro banda, tin tambe e asina yama Algemene Maatregel van Rijksbestuur, (AMvRB), pa medio di cua Rijksministerraad a base di articulo 51 di Statuut por remedia e situacion indesea cu a wordo crea. Esaki ta un ultimo remedio ora cu un Pais, den e caso aki Aruba, ta den situacion cu su organonan manera parlamento y gobierno no ta yega na un acuerdo e.o. pa cumpli cu acuerdonan riba nivel di Reino.  Rijksministerraad por meramente impone esaki riba Aruba, mirando cu e otro instrumentonan menos drastico no a funciona. Y cu esaki, Aruba mester cumpli cu e reglanan cu siguramente lo contene e.o. e palabracionnan di protocol firma riba e tereno di finanza. 

E ley LAFT ta poni pa wordo trata pa 9’or di mainta dialuna awor 3 di juni, y ta priminti di ta interesante pa pueblo sigui.