RMR no a trata nombramento Mito Croes pa Raad van State

ORANJESTAD - Conseho di Minister di Reino no a trata e nombramento di dr. Mito Croes como e representante di Aruba den e organo aki. Manera cu NoticiaCla a informa, fuera di aanwijzing, e candidatura di sr Mito Croes tabata riba agenda pa e reunion di diabierna, pa wordo sea aproba of rechasa. Pero e no a ni wordo trata, y a opta sinembargo pa pasa pa duna un aanwijzing na gobernador di Aruba.

Premier Eman a reacciona riba e asunto aki, indiga pasobra a keda sin tuma e conseho di Raad van State riba e nombramento aki. Tur esaki ta pone e prome mandatario conclui cu e Gobierno Hulandes ta mal usando su poder. "Locual nos ta mirando na e momentonan aki ta un Gobierno Hulandes cu ta mal usando su poder , un Gobierno Hulandes cu na e momentonan aki ta kibrando tur e reglanan di Statuut y nos no ta acepta esaki."

Croes lo mester a reemplaza Hubert Maduro cu a baha cu pensioen no poco tempo pasa. Maduro tabata na e manifestacion diabierna mainta y a comenta riba loke ta sosodiendo. Den esaki e la mustra (lesa otro articulo riba e topico riba www.noticiacla.com cu e siman aki Aruba a conoce un di e limitacionan di su autonomia. Tin varios, y esaki ta un di nan. Loke hopi no a gusta, ta su declaracion cu ta bisa cu Hulanda tin mas di bisa, pasobra e ta mas grandi. E relacion ta bisa partnernan mester ta igual, pero e realidad ta cu Hulanda ta mucho mas grandi y poderoso, y como tal Hulanda semper lo gana den aspectonan asina.