Presupuesto ta na Parlamento !

ORANJESTAD - Cu un retraso di 9 luna, Parlamento dialuna anochi laat a ricibi e presupuesto 2014 pa tratamento. Tabata propio minister di finanza Juan David Yrausquin cu a entrega esaki na presidente di parlamento Marisol Lopez Tromp. Segun Yrausquin, motibo principal di e tardansa ta pa incorpora tur cambionan haci relaciona cu acuerdonan sera cu e.o. sindicatonan reflehando reunionan di dialogo social. Pa e presupuesto por ta mas realistico posibel, a percura pa incorpora esaki, y asina logra tambe reduci por lo menos 100 miyon na gasto a la vez  den aparato gubernamental. E no tabata facil segun e mandatario, y a mustra cu ni cu e 100 miyon aki, e no ta yega e meta final aunke e ta un comienso. Tin informacion cu pa diabierna awo (despues cu comision central trata esaki) e por cuminsa wordo trata den parlamento mes. Simultaneamente, tin un problema cu partido MEP ta senjala, indicando cu e tempo cu a duna pa trata e presupuesto, ta simplemente mucho cortico. Di 20 minuut pa persona tempo di MEP, pa apenas 2 minuut y 13 ta sigur un inhusticia segun e partido. Di parti di partido AVP, no a tende ningun keho y nan a mustra di ta cla pa cuminsa trata e presupuesto aki.