CAFT riba prome U.R. pa 2019: Gobierno no a cumpli!

ORANJESTAD – Gobierno no a cumpli cu ningun di e puntonan di salida di e carta cu CAFT a manda pa Conseho di minister di Reino Hulandes fecha 15 di maart 2019 cu mester a tene cuenta cune den e raportahe di ehecucion di presupuesto pa prome cuartal 2019 (UR1). Asina e colegio di supervision (CAFT) ta comenta den su reaccion fecha 27 di mei 2019, esta dos dia pasa y cu ta publica riba nan website. Di otro banda, CAFT ta reconoce cu den un sentido e realisacion di e ehecucion ta den liña cu e prespuesto te cu prome cuartal. Conforme e incumplimento menciona, e colegio a manda 6 recomendacion pa gobierno cumpli cu ne den 14 dia, conforme e ley di LAFT.

INCUMPLIMENTO

Segun CAFT, ora cu nan a ricibi e UR (Uitvoeringsrapportage) di gobierno, e efectonan integral riba e prosupuestonan di e siguiente añanan di e asina yama reforma fiscal no tabata inclui. Como tal, e estimacion di impuesto riba e añanan nos dilanti *no por wordo susbstancia suficiente. Tampoco a tene cuenta cu e norma di gasto di personal di AWG 479 segun e protocol, *cu ta inclui e Crisis Plan Social y otro fondonan pafo di presupuesto. Esey tabata suficiente pa e colegio bolbe presenta recomendacionan necesario.

RECOMENDACION

E 6 recomendacion pa gobierno atende cune mester wordo manda pa e colegio mas tarda den 14 dia pa informa con nan (gobierno) tin pensa di duna contenido na dje. Entre nan mester adapta e presupuestonan di pais Aruba y/of Crisis Plan Social refleha e gasto di persona conforme e protocol di 479 miyon, *como tambe eheducion di e gastonan. Ademas di ricibi mas informacion riba e entradanan cu reforma fiscal lo trece cune riba e añanan nos dilanti, e colegio ta pidi Gobierno pa splika con e tin pensa di cubri gastonan adicional di AZV. Lesa e reaccion completo AKI!