SAC a tene su apertura di carnaval 61

ORANJESTAD – Stichting Arubaanse Carnaval (SAC) a tene nan apertura di Aruba su carnaval 61 diaranson mainta riba e orario 11:11:11 . Contrario na añanan anterior unda cu tabatin un celebracion mucho mas extenso y elabora, a opta pa tene solamente un conferencia di prensa na nan sede na Dakota, acompaña pa un brindis. Esaki den cuadro di un caso cu tin pendiente otro siman diaranson contra gobierno pa haya aclaracion riba e situacion cu tin actualmente. E caso tin cu trece claridad si enberdad SAC si por organisa carnaval 61 of no. Como tal a opta pa no presenta jingle (SAC su prome jingle) y e programa oficial. Reinanan y e prins cu panchonan tambe tabata presente durante e mainta aki. Mas lat NoticiaCla.com lo tin mas riba e conferencia aki.

Tabata den fin di siman cu den un combersacion cu NoticiaCla.com, cu presidente di SAC, Tecla Kelly a confirma cu e otro parti di e evento original planea, un fiesta mas grandi parti anochi dilanti di Sport Centrum na Santa Cruz, ta keda posponi. “Nos no a cancela, sino pospone” Kelly a sigura NoticiaCla.com.

Mes momento a confirma cu enberdad algun sponsor grandi a para, mirando cu ‘tin un incertidumbre’ grandi entre comerciantenan riba kico, y mas importante, ken ta organisa e carnaval. Saliendo di e punto cu tin un caso di LAR pendiente, unda cu cos por bolbe cambia, tin un incertidumbre no obstante e hecho cu gobierno a otorga e permiso pa organisa carnaval na e otro fundacion esta SMAC (Stichting Maneho di Aruba su Carnaval).

Manera ta conoci, e caso di LAR cu SAC a entama diahuebs contra gobierno di Aruba (lesa minister di asuntonan general Mike Eman y minister di cultura Otmar Oduber) , ta tuma lugar diaranson 19 di november proximo. Diabierna siman pasa, corte a notifica abogado nan di tanto SAC como gobierno di Aruba riba e fecha y cu e caso ta tuma lugar pa 8:30am. E intencion di SAC ta pa pidi hues pa para tur futuro permiso di wordo otorga na cualkier otro instancia cu no ta SAC. E argumento ta e.o. cu SAC como organisado di carnaval pa e ultimo 60 aña, a demostra cu nan ta esun cu tin e derecho, y cu no tin ningun motibo valido pa no duna SAC e permiso atrobe. Ademas, e hecho cu a duna SAC un permiso pa e apertura di carnaval , esta 11-11, ta pone cu ta logico cu esun cu habri carnaval, mester haya e permiso di carnaval completo. (lesa e carta di Corte aki)